Aruba Marriott a promove 57 asociado den prome mita di aña 2023

Hopi oportunidad di crecemento:

ORANJESTAD (AAN): Na Aruba Marriott Resort & Stellaris Casino, Aruba Marriott Ocean Club y Aruba Marriott Surf Club, e maneho di recurso humano ta excepcional. Ta un di e hotelnan cu e miho pakete di beneficio pa su asociadonan, pero cu ta ofrece mas opcion pa crecemento tambe. Anualmente ta habri vacatura interno, cu ta brinda oportunidad pa empleadonan por cambia di trabou, cambia di funcion y sin duda…cambia di salario. E prome seis lunanan di e aña aki, esaki no tabata un excepcion tampoco. 

Promove di paden prome!

            Reuella Berg, Director di HR Operations na Aruba Marriott, a duna di conoce tur e promocionnan ta algo pa celebra y comparti cu comunidad di Aruba pa asina demostra cu Aruba Marriott ta kere den su asociadonan. Aruba Marriott ta kere cu semper mester promove for di paden prome y ta esey mes por a mira cu e mas di 50 promocion cu tabatin den e prome mita di aña. Aruba Marriott ta masha orguyoso di e promocionnan di e asociadonan pasobra tur hende ta traha como un famia na e compania. 

Oportunidad di crecemento

            Siendo un di e hotelnan cu mas empleado na Aruba, por bisa cu anualmente ta recluta centenares di asociado nobo, mientras cu di otro banda ta promove e coleganan existente cu ta forma un carera den e compania mes. Asina un vacatura a habri, mesora ta solicita internamente, den un esfuerso pa cambia di trabou, subi di posicion y mehora e condicionnan laboral y di salario. Despues di pandemia, Aruba Marriott Resort & Stellaris Casino a nota un record den promocionnan interno, compara cu tur su añanan di existencia. Aña pasa, por ehempel, a promove no menos cu 137 asociado den e compania. 

Un “stepping stone” importante

            Luzdary Patterson-Leest actualmente ta Front Office Manager na Marriott Aruba Surfclub. El a cuminsa cu Aruba Marriott, recien gradua na aña 2011. Luzdary ta conta cu na e momento ey no tabatin un posicion di management pero el a mira Aruba Marriott como un stepping stone pa por sigui crece den e compania. E tempo ey el a cuminsa como Executive Administrative Assistant. El a sigui diferente curso y a haya e posicion di Front Desk Manager. Awo el a haya un promocion como Front Office Manager.

            E conseho cu Luzdary tin pa esnan cu tin pensa di forma un carera na Aruba Marriott ta pa aplica sin miedo. Tin hopi posicion cu por fit cada persona. Aruba Marriott ta traha como un famia pues por ta sigur cu ta e sentimento ey mes lo tin na momento di traha. Ademas, tin hopi oportunidad pa crece den Aruba Marriott, tanto como den posicion pero tambe como persona.  

Di stagiaire pa director

            Giancarlo Gomez actualmente ta Director of Procurement pa tur propiedad di Aruba Marriott. El a cuminsa traha ey como un stagiaire den e departamento di Finance & Accounting. Despues di stage el a sigui cu su estudio. Asina cu el a haya su diploma, mesora Aruba Marriott a ofrece un posicion di “Voyager” cu ta un “Manager Development Program” caminda e tabata bou guia di e managernan y e lidernan actual.

            Nan a dun’e guia den e diferente departamentonan di Aruba Marriott. Prome e tabatin e posicion di Procurement Manager cu basicamente kiermen cu e ta encarga cu compra pa e operacion di tur bar y restaurant cu tin den e propiedad. E ta encarga pa cumpra tur producto cu tin mester den e bar y restaurant.

            Giancarlo ta conseha tur esnan cu ta studiando y ta den e ultimo aña pa haci un stage y den futuro kier forma parti di e famia di Marriott pa aplica y asina por tin un idea di kico tur Aruba Marriott tin pa ofrece. Giancarlo mes a cuminsa como un stagiaire y awo e ta Director of Procurement, pues sin duda Aruba Marriott ta ofrece hopi oportunidad pa crece. 

Hopi beneficio na Aruba Marriott

            A promove Joshua Gomez como Senior Food & Beverage Supervisor. Su carera na Aruba Marriott a cuminsa na front desk dos aña pasa. Joshua a cuminsa traha como un Front Desk Agent. Despues di a traha como Front Desk Agent, Aruba Marriott a brind’e oportunidad pa aplica como Banquets Captain y el a tuma e chens. El a eherce e trabou y recientemente a crece y bira un Senior Food & Beverage Supervisor. Aña pasa Joshua Gomez tabata e Supervisor of the Year na Aruba Marriott. Joshua ta recomenda pa aplica na Aruba Marriott mirando cu e ta un compania cu ta cuida su asociadonan y ademas tin hopi beneficio pa traha na Aruba Marriott.