Aruba Marriott a expresa gratitud durante siman di aprecio di empleadonan

ORANJESTAD (AAN): Manera ta custumber di tur aña, Aruba Marriott Resort & Stellaris Casino a organisa un siman di actividad como parti di nan siman di aprecio di empleadonan, esta “Associate Appreciation Week”.

E siman di aprecio a inicia dia 17 di november y a termina dia 22 di november ultimo.

    Celebra den grandi: Reuella Berg, Director di HR Operations, a enfatisa cu siendo e compleho di hotel di mas grandi na Aruba, cu mas empleado y cu ta opera 24 ora pa dia, ta importante pa un siman pa aña para un rato keto y dedica tempo adicional na e empleadonan.

   Ta un siman pa relaha cu eventonan mas social pero tambe pa cera conoci miho cu coleganan trahando den e tres hotelnan y e casino.

   Pa Aruba Marriott Resort & Stellaris Casino ta importante tambe pa duna bek na comunidad. Arthur Santos, Director of Finance Operations, a expresa cu algun empleado a pasa Kinderhuis Imeldahof pa celebra 30 aña cu e muchanan.

   Ademas di 30 aña di Aruba Marriott Resort & Stellaris Casino, nan ta celebra 26 aña di Care Foundation, cu a inicia na aña 1999. Mayoria di e fondonan di Care Foundation ta bin di parti di e empleadonan mes. 

   Wega pa empleadonan: Riba e di dos dia di actividad, pero den oranan di anochi, e empleadonan a hunga padel. Jason Zeng, Human Resources Manager, a duna di conoce cu e empleadonan a pasa un rato na Aruba Padel Club pa experencia Glow in the Dark Padel Event.

   Riba diaranson a tuma luga “Morning Masterminds” den e ballroom di Aruba Marriott. Marylaine Feliciana, Director of Learning & Development, a comenta cu organisa un “game day” pa asina e empleadonan pasa un momento den bon ambiente.

   Mas cu claro, pa Aruba Marriott ta importante pa tene cuenta riba e empleadonan cu ta traha den e oranan di anochi. Ben Figaroa, Casino General Manager, a conta cu riba diaranson anochi a celebra e “Associate Appreciation Week” caminda a expresa danki na e empleadonan pa nan trabou duro di henter aña. E actividad di diaranson tabata uno peculiar pasobra e tabata pa esnan cu ta traha shift di anochi, of pa esnan cu no ta haya un oportunidad den dia pa participa den e actividadnan.

   Rato pa famia: Riba e di cuater di “Associate Appreciation Week” a organisa un “Family Movie Night”. Licielle Hoek, Human Resources Supervisor, a splica cu a organisa un rato di pelicula den ballroom di Aruba Marriott Resort pa e empleadonan por experiencia un actividad hunto cu nan famia tambe.

   E ultimo actividad a tuma luga na Eagle Bowling. Luzdary Leest, Human Resources Manager, a comenta cu e empleadonan a gosa durante e ultimo evento. Leest ta invita tur esnan cu tin interes pa inicia nan carera den e sector hotelero pa bishita careers.marriott.com pa explora tur e vacaturanan cu tin habri. Tin vacatura pa tur interes y tur talento, aplica pa asina bo ta parti di e famia di Aruba Marriott.