Entrante 14 di Juli Aruba ta reconoce e valides di e 'Smart Health Card'
ORANJESTAD (AAN): Ora di bay over na flexibilisacion di medidanan ta tene cuenta no solamente cu e mercadonan, pero tambe cu e situacion na Aruba. Asina CEO di Oficina di Turismo, Ronella Croes a indica dialuna den conferencia di prensa.
El a bisa cu pa loke ta trata maneho di e virus ta importante pa cana e caminda cu ta canando localmente y pa tene cuenta cu tur locual ta wordo treci dilanti y pa evita cu lo mester cambio den e flexibilisacion.
Croes a remarca cu un di e aspectonan importante ta e maneho di entrada pa bishitantenan cu ta dicidi di haci un vacacion na Aruba. For di prome instante caba a bisa cu esaki ta un maneho mas stricto y a mantene esaki tambe.
Aworaki, sinembargo, ta reconoce cu esnan vacuna lo por pasa den cierto cambionan cu ta nifica un beneficio pa nan, a anuncia.
Di e manera aki, Ronella Croes a duna di conoce cu entrante 14 di Juli, esta diaranson, Aruba lo cuminsa acepta prueba di vacunacion en bes di test pa residentenan di Merca.
Esaki ta un prome paso y ta sigui traha riba otro pasonan pa flexibilisa un tiki mas.
Pa esnan cu no tin un 'Smart Health Card', cu ta locual Aruba ta rekeri di e residentenan di Merca, y e persona ta completamente vacuna, ainda por bishita Aruba y tin cu presenta e resultado di test negativo conforme e maneho actual.
Aruba ta sigui ta habri pa tur esnan cu kier bishita Aruba for di Merca y tur otro pais tambe. Pero pa esnan completamente vacuna tin diferente aspecto cu ne.
Ken ta bin na remarke pa presenta e prueba di vacunacion?
- Esaki ta valido pa e personanan residente di Merca y cu kier viaha for di Merca.
- Pa esnan cu a ricibi e vacunanan cu ta autorisa pa Food & Drug Administration (FDA) of autorisa pa European Medicines Agency (EMA) na Europa. Ta trata di esnan cu a vacuna cu un vacuna di Pfizer, Moderna, AstraZeneca y Johnson & Johnson (esaki ta e vacunanan cu Aruba ta acepta conforme e organisacionnan menciona).
- E personanan mester ta vacuna 14 dia prome cu efectua e viahe.
- Pa completa e proceso lo rekeri un 'Smart Health Card'.
Croes a enfatisa cu tur esaki ta valido pa turistanan for di Merca. No tin nada di haber cu residentenan di Aruba cu ta regresando di Merca of cu kier efectua un viahe pa Merca. Eynan tin cu tene cuenta cu locual Merca ta rekeri, y den caso di Aruba, si bo ta completamente vacuna, bo por presenta bo prueba di vacunacion pa medio di e 'Aruba Health App'.
E 'Smart Health App' pa e mericanonan ta wordo obteni door di esnan cu a vacuna na cualkier Wal-Mart, y Sam's Club Pharmacy na Merca.
Pa e estadonan di California y Louisiana, e 'Smart Health Card' ta obtenibel sin importa unda e persona a vacuna. Na e estadonan aki caba tin e sistema completamente integra y nan no ta mar'e solamente na e dos instancianan menciona, a splica.
E 'Smart Health Card' lo mester wordo carga y poni riba e plataforma di 'CommonPass. Esaki ta un di dos paso den e proceso, Ronella Croes a duna di conoce.
E prome ta cu e turista mester tin su 'Smart Health Card' y e di dos ta cu e tin cu 'download' e App di CommonPass (cual ta gratuito) si e no tin'e ainda. Aña pasa Aruba a haci un 'partnership' cu 'CommonPass', den e caso aki cu jetBlue, pero tur aerolinea ta acepta 'CommonPass' y tur hende por 'download' esaki den forma gratuito.
Simplemente e turista mester coloca e 'Smart Health Card' y e informacion rekeri riba e plataforma di CommonPass.
E ultimo paso ta cu e turista ta haya un 'CommonPass ID', un codigo y e codigo aki nan ta pone riba e plataforma di imigracion di Aruba. Esaki ta e proceso cu e turista mericano tin cu completa ora di haci un viahe pa Aruba, e CEO di ATA a splica.
Aruba ta reconoce e valides di e 'Smart Health Card' y esey kiermen cu e turista aki no mester di entrega un PCR test negativo mas pa por drenta Aruba.
