Aruba lo bay haya show fabuloso di Drifting

Speedworld cu bo amigo Hubert ‘Furai’ Tiel.  Amigo- y amiganan, amantenan di fabuloso mundo di motorsport,

bon bini un biaha mas na boso pagina preferi di deporte di motor, unda mi ta deleita boso cu algun informacion nobo pa cu e sport aki.

   Diadomingo a tuma lugar riba International Raceway Park Palo Marga, un training pa e autonan di drift.  Esaki ta relaciona cu un competencia di drifting cu lo tuma lugar.

   E lo no ta djis un competencia di drifting, sino e lo bay wordo acompaña cu e celebracion di 20 aña di Jason Fun, kende ya tin 4 lustro envolvi den e mundo local di drifting.

   Speedworld a haya sa, cu pa e dia grandi aki di Drifting, Fun a menciona ya caba cu e lo ta estrenando su proyecto nobo (auto nobo), cual ya caba ta como 85% cla.   El a mustra cu ta trata aki di un auto completamente nobo cu ta contene tur ultimo desaroyo pa asina bo por haci e practica di drifting na un forma fenomenal.

   Jason Fun a priminti cu e show, y tambe su auto lo bay bira algo hopi grandi.  A compronde cu lo tin tambe un dia mas di training cu lo wordo anuncia mas despues, pa e autonan di drifting.

   Loke ta hopi remarcable ta cu na Aruba tin varios auto bon prepara, cu bon driver, pues pa e dia di competencia lo bay tin un bon espectaculo di drifting pa mira riba e isla aki.

   Un otro noticia cu Speedworld kier corda tur hende ta riba e fundraising barbecue ta di amigo Kevin ‘Kip’ Hassel, kende ta recaudando fondo Diadomingo 13 di Maart venidero, cu e meta pa yude bay busca su salud den exterior.

   Tur hende sa cu Kip ta un persona kende a dedica hopi tempo na deporte di Dragracing, specificamente den categoria di Motorcycle.  E ta un experto kende a planta hopi respet.  E ta un persona, kende tur ora nan papia di dje, bo sa mesora cu ta bon competencia bo ta haya.  Apart di esey, Kip ta un persona cu a haci reparacion na hopi brommer na Aruba, y tambe na Curacao el a haci esey.

   Pues un boca bisa otro, pa tur hende yega cerca Kevin y yude cu su fundraising.  A compronde cu lo bay tin un Brassband y hasta un Mariachi pa asina anima esnan cu bay yude cumprando un cuminda.  Lo no bende alcohol e dia aki.  Tampoco lo no permiti ningun chauffeur haci desordo cu auto, y tampoco ningun manehador haci esey cu brommer den su caya, como cu biaha pasa el a tene actividad na su cas, esaki a sali fo’i  man cu hopi burnout y revv di motor, y esey a haci cu despues el a haya hopi problema cu bisiñanan na Lago Heights.  Pesey pa evita esey, no ta permiti ningun hende bin haci desordo.

   Saludos na tur hende, drive safe, core trankil.  Si bo kier drift, burnout, of careda, esey tin di wordo haci riba pista di Palo Marga.  Te otro siman.