Aruba Lions Club yudando muchanan di scol_

ORANJESTAD (AAN):  Como un di e organisacionnan cu mas tanto aña sirbiendo nos comunidad, Aruba Lions Club ta realisa su proyecto di “Back to school” un biaha mas,

enfocando riba esnan den necesidad y e biaha aki repartiendo pakete di alimentacion pa muchanan di scol.

            Tur comienso di aña escolar tin un cantidad di muchanan cu ta pasa den dificultad pa cuminsa nan aña escolar pa falta di uniform, material pa scol of schoolgeld caminda cu hopi biaha Aruba Lions Club sa yuda den esaki ora cu tin e fondonan disponibel.

            Banda di esaki tin hopi muchanan na Aruba cu ta bayendo scol mainta sin desayuna of ta bay scol sin cuminda pa come durante pauze di scol. Netamente e alimentacion y nutricion di un mucha ta uno esencial pa cu su desaroyo fisico y mental. Sin esaki un mucha dificilmente por concentra durante lesnan na scol pa cual e por cay atras den esaki. 

            Un caminda cu sigur Aruba Lions Club ta yuda cune tur aña ta e parti di alimentacion pa e muchanan den necesidad di esaki. Aruba Lions Club tin su manera di con pa yega na e nombernan aki pa asina por ofrece e muchanan un pakete di comestibel cu nan por hiba alimentacion scol of tambe tin algo pa desayuna mainta.

            E siman tras di lomba e club di servicio aki por medio di su miembronan a prepara un gran cantidad di e paketenan menciona y durante fin di siman a reparti esakinan personalmente na cas di e muchanan den necesidad.

            Un bunita gesto sigur y tambe pa mira con agradeci cada un di e famianan aki ta keda na momento di ricibi e pakete yena cu comestibel.

            Aruba Lions Club, cu ta sirbiendo comunidad pa mas cu 75 aña caba, ta sigui haci su proyectonan pa comunidad y kier a gradici e pueblo y e comerciantenan cu a yuda haci esaki posibel durante tur e aña nan aki. E organisacion sigur tin e confiansa cu nan lo sigui ricibi e ayudo di e pueblo y e comerciantenan pa cu nan actividadnan pa asina recauda e fondo necesario pa por sigui yuda tur esnan cu tin mester.

            E club di leonnan ta contento di un biaha mas por a cumpli cu nan meta cu e ayudo na comunidad y asina ta sigui prepara pa un siguiente actividad pa recauda fondo cu ta un “Car Rally” diasabra 28 di September venidero y cu bo participacion nan por sigui yuda e comunidad.

Laga nos ban sostene e actividadnan aki pa distrae e mente cu algo diferente for di e siman duro di trabou y tambe forma parti di esnan cu ta yuda nan prohimo.

Aruba Lions Club sirbiendo comunidad.