Aruba Lions Club satisfecho cu nan actividad di Salud

ORANJESTAD (AAN): Ultimo tempo tin hopi interes pa cu esnan den necesidad pa bishita dokter of haci controlnan medico,

y esaki mirando e gran cantidad di hendenan riba lista di espera ta bira dificil pa por ricibi un cita medico pa un control.

   Tabata Diasabra dos siman pasa, cu Aruba Lions Club un di e clubnan di servicio mas bieu riba e isla un biaha mas a presenta un bunita proyecto pa asina cumpli cu nan meta di yuda comunidad.

E biaha aki a organiza manera custumber e famoso “Health Fair” pero e biaha aki esaki a tuma lugar den e distrito di San Nicolas na St. Augustinus College.

   For di oranan trempan di mainta e preparacionnan a cuminsa pa e miembronan di Aruba Lions Club pa asina cuminsa ricibi e promer bishitantenan cu for di 8or di mainta por a cuminsa registra y mientras ta warda turno nan por a disfruta di algun cos di come saludabel y fruta, hunto cu un thee, koffie of juice.

   E actividad a dura te cu 12’or di merdia caminda un gran cantidad di ciudadanonan a worde yuda.

Den e dia di control di salud aki por a haci e controlnan di entre otro: wowo, oido, djente, control di pecho y esun mas bishita e seccion di control di sanger caminda ta tuma midi di haltura, peso, check sanger pa cholesterol y diabetes y despues ta ricibi un conseho di docternan presente.

   Hopi comentario positivo di e bishitantenan cu a keda masha agradeci pa e oportunidad cu nan a ricibi y hopi a pidi pa por ripiti esaki den futuro.

   Aruba Lions Club kier a gradici sigur tur cu a yuda den esaki manera, Mary-Joan Foundation, FEPOH y Quota, Aruba Vision Center, Techno Dent cu e smile mobil, y sigur Xavier University cu ta manera un organizacion ruman di Aruba Lions Club cu semper ta yuda cu un cantidad di studiantenan y docternan pa haci e evento aki posibel.

   Tambe ta gradici St. Augustinus College cu a pone e school disponibel, y tur miembronan di Aruba Lions Club, LEO Club y otro voluntario cu a duna un man den e proyecto aki.