Diasabra awor e ta na Xavier University na Playa
ORANJESTAD (AAN): Un biaha mas, Aruba Lions Club ta prepara pa ripiti nan exitoso ‘Health Fair” cu a ser teni na Juni 2023. Esey ta loke president di e club, Rubin Ponson a declara den un entrevista cu DIARIO.
El a splica cu pa nan, e evento di ‘Aruba Lions Health Fair 2023’ tabata exitoso, unda den un solo dia a atende cu un publico grandi cu a bay pa asina haci chekeo riba diferente parti cu tabatin, manera e.o. chekeo di sanger, sucu, orea, y wowo.
Decision a caba di wordo tuma, cu Aruba Lions Club lo bay ripiti e Health Fair aki pa 2024, y cu pronostico cu e lo bay bira un actividad anual na beneficio di publico. E ta algo cu ta cuadra den e mision di Aruba Lions Club, como cu nan ta enfoca riba parti di salud tambe.
Ponson a indica cu e feedback cu nan a ricibi di publico cu a asisti na e Health Fair di aña pasa, tabata prometedor. A haya comentario ya e mesun dia, y otronan cu a expresa esaki algun dia despues. Sorprendentemente nan a keda ricibi comentario positivo pa varios luna despues. Nan a splica cu danki na Aruba Lions a logra di haya un check-up, y a ricibi conseho pa sigui haci un follow up riba cierto aspecto. Y awor na ta siguiendo cu e follow-up aki cu nan mediconan profesional pa yudansa.
Esaki pa Rubin Ponson ta e parti mas importante, esta cu e ciudadanonan cu trigger algo durante e testnan aki, lo haya conseho pa inmediatamente busca yudansa di experto medico, pa asina follow-up y haya yudansa mas avanza, y cu chens grandi cu nan ta na tempo pa ricibi tratamento pa nan salud.
Awor pa 2024: Segun Ponson, awor pa 2024 nan lo bay tin e mesun instancianan presente na e Health Fair cu ta bay ser teni awor na un lugar nobo, esta na Xavier University mes. Lo bay tin e.o. Mary Joan Foundation pa cancer di pecho, FEPO cu Quota Club International pa parti di oido, Aruba Vision Center y The Specialist pa chekeo di wowo, Aruba Lions cu su mesun Smile Mobile cu lo percura pa haci limpiesa di dentadura, Xavier University cu lo check sanger pa diabetes, cholesterol, presion, y tambe haya conseho medico riba bo resultadonan.
Pa hopi tempo caba, Aruba Lions y Xavier University School of Medicine ta trahando hunto riba diferente proyecto, y mescos ora nan tin proyectonan tambe, ta pidi Lions bay coordina actividadnan. E ta un gran ayudo, pasobra ta pone gran cantidad di studiante disponible pa yuda haci e fluho di personanan bay mihor durante e Health Fair.
Adres nobo: Rubin Ponson a confirma cu pa 2024, nan lo bay tene esaki na Xavier University cu tin riba Santa Helenastraat na Playa. Esaki ta pa asina tur hende ta paden den airco. Pasobra aña pasa na e sede di nan club den Engelandstraat, a keda chikito pa e multitud di hende cu a aglomera pa e Health Fair.
Xavier University ta mas espacioso, cu espacio necesario pa e Health Fair. E sala di espera ta espacioso y ta completamente aireacondiciona, y esaki lo haci e ambiente mas agradabel pa sinta warda turno.
Aruba Lions Club Health Fair 2024 ta completamente gratis, pues lo no bay pidi ningun clase di pago. E ta djis un esfuerso di nan pa yuda comunidad, y ta un di e proyectonan cu ta traha duro riba dje.
E lo bay ta Diasabra awor, 8 di Juni 2024 for di 9:00 am te cu 2:00 pm E ta completamente gratis.
