Aruba Lions Club cu bunita proyecto pa nos grandinan

ORANJESTAD (AAN): Aruba Lions Club den su aña leonistico di celebracion 75 aniversario, ta bolbe cu un di su bunita proyectonan despues cu pandemia a stroba pa un temporada, pero e leonnan ta back cu e "Smile Mobile".

   Algun luna atras nos a presencia e re-indroduccion di e cara nobo di "Smile Mobile", awe por anuncia cu weekend di 25 y 26 di maart 2023, e "smile mobile" a sali na dos ocacion, pa e Centro di Cuido na San Nicolas diasabra y despues pa Maris Stella riba diadomingo.

   Den presencia di dos autoridad internacional di e organizacion di Lions, hunto cu miembronan di Aruba Lions Club y tambe e hobennan di Leo Club, e proyecto a cuminsa for di oranan di mainta.

   Den e mobile aki por a presencia con e dentadura di nos grandinan ta pasa un proceso di limpieza y reparacion den man di profesionalnan cu ayudo di e muchanan di Leo Club cu ta registra y busca esakinan.

   Durante e momento aki tambe e grandinan ta worde entreteni cu musica di e miembronan di Lions y na momento di entrega di e dentadura nan ta ricibi esaki cu un pakete di pasa boca.

   Pa esnan cu ta duna e servicio di cuido, tambe a ricibi un pakete for di man di e Leo Club, como muestra di aprecio pa e bunita trabao cu nan ta eherce di cuida nos grandinan.

   Esaki sigur ta un bunita proyecto di Aruba Lions Club cu un biaha mas ta demostra nan pasion como voluntario pa sirbi den comunidad y yuda caminda cu tin necesidad.

   Aruba Lions Club kier gradici tambe na e voluntarionan "Friends of Lions" cu a yuda pa prepara e paketenan, tambe un danki ta bay na Price Smart cu tambe a contribui pa por a logra e paketenan cu "pasaboca".

   Un palabra di pabien pa Aruba Lions Club y su Leo Club pa e proyecto aki y asina tambe preparando pa e weekend aki nan bishita na Paviljoen.