Aruba Lions Club apoyando Fundacion Bethel Aruba

ORANJESTAD (AAN): Aruba Lions Club ta sumamente orguyoso cu por a yuda y sigui contribui na Fundacion Bethel Aruba pa amplia nan facilidad cu dos baño y dos wc pa por acomoda tur e 28 clientenan cu ta bishita nan localidad.

   Fundacion Bethel Aruba a ser funda cinco aña pasa door di Señora Irena Gomes cu e meta pa yuda y duna esnan cu no tin luga sigur mas pa biba. Señora Gomes hunto cu su team ta habri porta y ta duna un luga sigur pa e 20 clientenan por come, drumi y baña. Tambe Fundacion Bethel ta yuda esnan cu mester rehabilitacion pa ora oportunidad presenta di traha y bay back den comunidad nan ta bon prepara.

   Aruba Lions Club a worde acerca door di Señora Gomes pa yuda cu facilidad pa baño, pues Aruba Lions Club a huur toilet y douche portatil como un solucion pa corto tempo mientras ta busca solucion pa tempo largo. Pues dia 12 juni 2021 miembronan di Aruba Lions Club a logra di finaliza y haci entrega di e dos baño pa douche y dos toilet. Palabra di agradecimento ta bay na miembronan di Aruba Lions Club y Jorge di Neptali Park cu a logra e meta pa amplia e facilidad di Fundacion Bethel Aruba.

   Trahando cu Hulanda:  Fundacion Bethel Aruba ta traha directamente cu un fundacionnan cu tin e mesun meta aya na Hulanda y ya caba a logra manda cuater cliente pa sigui cu rehabilitacion na e fundacion hulandes, di cual dos di nan a integra den e sistema y ta trahando na un compania grandi y cu un futuro prometedor. Fundacion Bethel ta comunica directamente cu senora Jennifer Martis, cu ta e persona di contacto entre e Fundacion Bethel Aruba cu e instancia na Hulanda. Nos kier desea Fundacion Bethel Aruba y su clientenan cu a sigui pa e siguiente etapa, hopi exito y pa sigui traha duro pa logra nan metanan.

   Ayudo pa completa restauracion: Den pasado Aruba Doet a yuda e Fundacion Bethel Aruba cu materialnan necesario cu a yuda pa nan lugar luci. Ainda falta hopi pa haci, y actualmente nan ta trahando ariba un trailer pa drecha y mester di plywood, verf, bentana, scruf y material pa drecha e dak pa evita lekmento durante yobida. Tambe nan tin mester di palo pa nan por traha cashi di paña y asina por tin nan pertenencianan personal adecuadamente warda.

   E cliente nan aki ta persona nan cu tin un profesion of habilidad di haci diferente trabao y loke mester ta material pa nan caba di haci e restauracion completo di e compleho. Fundacion Bethel Aruba ta haci suplica na tur comerciante y persona nan cu por tin material menciona cu por worde duna pa asina nan por continua cu e restauracion.

   Cla p'e Comienzo Nobo: Na tur esnan y comerciantenan cu lo kier yuda contribui na Fundacion Bethel Aruba, por haci esaki door di tuma contacto cu señora Irena Gomes na 568-1599. Cualkier contribucion cu haci lo worde aprecia, como cu nan ta traha abase di boluntario y cu donacionnan cu nan ta ricibi.

   Ayudo di parti di Gobierno no ta ser ricibi ainda pa motibo cu nan peticion ta "tranca" door di e pandemia y como Gobierno ta demisionario esaki a haci e proceso tarda un poco mas. Señora Gomes hunto cu e miembronan di directiva ta keda optimista y cu pronto nan lo haya mas ayudo pa sigui duna apoyo y speranza na tur nan clientenan. Manera e number mes ta bisa; Fundacion Bethel Aruba, Bethel ta saca di bijbel y ta significa: "Comienzo Nobo".