ORANJESTAD (AAN): E siman aki, A.T.A. a lansa e promer webinar di un series di webinar pa e partnernan di e conocido Health & Happiness Code - HH Code.
DIARIO a compronde cu e prome webinar cu a tuma luga a worde duna door di profesionalnan unda a comparti nan conocemento y experiencia pa asina por amplia y brinda mas informacion riba topiconan relevante pa e miembro(nan).
E webinar specifico aki a toca e tema di “Google my Business” y tambe a brinda tips and tricks pa cu e diferente median di “Social Media” cu por worde uza actualmente. Den e webinar a brinda splicacion con un compania por tuma control di nan google page y asina bira mas visibel riba un plataforma asina importante den e mundo turistico.
E webinar a worde brinda na tur partner cual a registra pa oportunidad aki. Pa esnan cu no por a atende e webinar e link cu un recording si e webinar a worde manda per email.
Alavez A.T.A. ta informa cu lo tin mas webinar na caminda cu sigur lo ta valioso pa bo compania. E proximo webinar lo toca e tema di “Content writing”. HHCode kier invita tur hende pa keda pendiente di nan email, pa asina por atende e proximo webinars, y crea mas balor pa bo compania.
Aruba Health & Happiness Code ta percura pa e siguridad di nos localnan como tambe nos bishitantenan ta keda garantisa.
