Aruba Food & Beverage Association a organiza un 'Job Fair 2023'

ORANJESTAD (AAN):  Aruba Food & Beverage Association conhuntamente cu Departamento di Progreso Laboral (DPL)  ta organisando un Job Fair,

cu lo tuma lugar na Renaissance Convention Center, riba diamars 13 di Juni, 2023. E evento aki lo ta di 11'or di mainta te 7'or di anochi.

   Segun Carolina Merryweather, presidente di Aruba Food & Beverage Association, esaki ta un tremendo oportunidad pa cuminsa of boost bo carera, mirando cu durante e evento lo tin varios compania di e industria bao di un solo dak. No ta un secreto cu e industria tin un scarcedad grandi di trahador, y hunto cu DPL nan ta purbando di atrae y yena e vacaturanan cu mas trahador posibel.  

      E evento aki ta pa persona cu experiencia profesional cu ta buscando pa crece den nan carera, y tambe pa talento nan nobo den hospitalidad buscando un carera den bar of restaurant. E evento ta ideal pa recien graduado cu kier cuminsa avansa den nan soñonan, of cu kier mehora nan abilidad di interview y interactua cu hende.

   Merryweather a splica cu mas di 50 restaurant y bar lo ta presente den Job Fair y lo tin mas di 400 vacatura pa por aplica. Simplemente bishita, colecta informacion y scohe e trabou cu mas ta pas cu bo persona. E ta e manera perfecto pa conoce e posicionnan disponibel y tambe papia cu e personanan cu ta traha na e compania. Scucha nan storia y probecha pa papia directamente cu nan. Pa esnan cu mester di mas informacion, por bishita nan website jobfairaruba.com.

   Entrada ta gratis y cada compania lo brinda nan oferta di trabou. Trahando den hospitalidad ta dushi y valioso. No tin un mihor oportunidad pa haya un trabou den e industria dinamico, exitoso y agradabel. E Job Fair ta bo oportunidad pa avansa den bo bida.