Aruba Fashion Week lo enfoca mayoria evento na JOIA Aruba by Iberostar  

ORANJESTAD (AAN): Aruba Fashion Week ta back di 11 pa 14 di december 2025, pa celebra moda, cultura y luho Caribense na un nivel distingui.

E edicion di aña 2025 ta tuma luga den e maraviyoso resort JOIA Aruba by Iberostar, ubica na Eagle Beach.

   Esaki ta un edicion special cu ta ricibi back e famoso diseñador internacional Agatha Ruiz de la Prada, conoci pa su estilo audaz y expresivo, hunto cu nos orguyo nacional Ronchi de Cuba, cu su vision creativo ta continua duna voz y identidad Caribense riba e escena internacional. Nan ta uni na diseñadornan, modelonan, celebridadnan, medio y influencernan for di diferente pais pa un experiencia di moda y inspiracion di cuater dia.

   E evento a inclui palabra inspirador di Angel Leon, Director di Aruba Fashion Week, kende a destaca e vision y mision pa e edicion di e aña aki; Arnaud Le Lanchon, General Manager di JOIA Aruba by Iberostar, hotel anfitrion oficial, cu a enfatisa e vision di e hotel pa sostene y celebra e identidad cultural di nos comunidad; Ivelisse Simon, Events & Sponsorship Specialist di Aruba Tourism Authority (A.T.A.), cu a subraya e potencial di Aruba Fashion Week pa atrae visitante cu poder halto di compra cu ta busca un experiencia di estilo di bida di luho; Junior Arends di Departamento di Cultura Aruba (DCA), cu a reafirma e compromiso di gobierno pa sigui apoya e industria creativo y innovacion cultural; y Ronchi de Cuba, diseñador local renombra, cu a comparti su perspectiva riba e evolucion di moda Arubiano y su influencia creciente den region.

   E programa: (*) Diahuebs, 11 di december ta habri Aruba Fashion Week na gran estilo cu e Kick-Off Event na ZIMA Rooftop Bar na 7:00 pm.  (*) Diabierna, 12 di december ta cuminsa pa 4:00 pm cu e Meet & Greet di diseñadornan y e apertura oficial di e Showroom na Red Sail Boutique JOIA Showroom. Sigui pa 5:00 pm cu un brindis na ZIMA, y pa 6:00 PM e pasarela ta cuminsa den lobby di JOIA.

   (*) Diasabra, 13 di december tin otro brindis na ZIMA pa 5:00 pm y un otro gala di moda pa 6:00 PM den lobby di JOIA.  (*) Diadomingo, 14 di december ta habri cu un Catamaran Fashion Sail (exclusivo pa prensa) for di 9:00 am te 1:00 pm. Den atardi (2:00–5:00 PM) ta tuma luga e Buyers & Bubbles Shopping Event na Red Sail Boutique JOIA Showroom, y e siman ta cera cu e elegante Sunset Soiree na ZIMA Rooftop Bar for di 5:00 pm te 7:00 pm.

   Ticketnan pa Aruba Fashion Week 2025 ta disponibel online via Eventbrite y tambe algun lugar mas.

   Aruba Fashion Week ta sigui profila e excelencia creativo Caribense y posiciona Aruba como destino global di moda y estilo di bida.