Aruba Doet a pone hopi hende dobla manga den fin di siman

ORANJESTAD (AAN): Manera DIARIO a trece dilanti, e di diez edicion di Aruba Doet a cuminsa diabierna mainta dia 11 di maart na Centro Famia Piedra Plat, inaugura pa Gobenador Alfonso Boekhoudt.

E comienso di 190 proyecto cu ta forma parti di Aruba Doet cu lo worde ehecuta den dos dia cual lo ta un metamorfosis pa hopi sitio na Aruba.

   Mas grandi cu nunca: E aña aki tin 190 proyecto cu a worde registra na Aruba Doet, di cual 3.500 boluntario ta necesario pa realisa e proyectonan. E boluntarionan ta worde considera e curason di varios organizacion social. CEDE Aruba y Oranje Fonds ta demonstra con importante e ciudadanonan activo ta den un comunidad. Tambe, Aruba Doet ta subraya un imagen positivo di boluntario y tambe con un persona por diverti como un boluntario.

   Riba e prome dia di e evenemento di Aruba Doet tabata tin 45 proyecto cu a worde ehecuta. Tabata tin hopi pintamento, a trabao den hardin, pero tambe nos grandi nan di Stichting Ster y tambe cliente nan di Respaldo cu a pasa un mainta di diversion pa medio di un tour rond di nos isla y a worde bon atendi pa medio di nos boluntarionan cu a registra pa yuda cu e proyecto specifico akinan.

   Anualmente mester dobla e manganan di camisa!  Diasabra anualmente e mayoria proyecto nan ta worde ehecuta. E diasabra aki un otro 155 proyecto ta tuma lugar entre otro na diferente organizacion, scolnan, sport clubs, scouting y casnan di cuido cu e ayudo di hopi boluntario.