Aruba den encuentro cu presidente electo di Costa Rica Laura Fernández Delgado

Prome Minister Mike Eman ta representa Reino Hulandes na Costa Rica

ORANJESTAD (AAN): Durante su bishita oficial na Costa Rica, Prome Minister Mike Eman a comparti cu e agenda di encuentro ta bayendo di forma positivo, cu enfoke riba fortalece relacionnan bilateral y regional.

Un di e momentonan principal tabata encuentro cu presidente electo di Costa Rica, Laura Fernández Delgado, kende diabierna mainta lo ta instala oficialmente den cargo durante un ceremonia na Stadion Nacional di San José. Durante e ceremonia di instalacion, Aruba ta representa Reino Hulandes, reafirmando e lasonan diplomatico entre e regionnan.

Segun e Prome Minister, e encuentro cu presidente electo a permiti un intercambio importante di idea riba cooperacion entre Costa Rica, Aruba y Reino Hulandes.

 “Nos ta trece un perspectiva unico como Reino, cu presencia tanto den Europa como den Caribe y Latino America,” el a indica.

E bishita na Costa Rica ta forma parti di un esfuerso mas amplio pa posiciona Aruba dentro di dialogo regional, fomentando colaboracion y intercambio cu paisnan bisiña, den Centro y Sur America.