*Pa mantene naturalesa saludabel
ORANJESTAD (AAN) — Tyson Lopez, director di Aruba Conservation Foundation (ACF), den entrevista cu Matutino DIARIO clarifica riba e proyecto cu ta tumando lugar na Mangel Halto.
“E proyecto aki enberdad a trece un tiki conmocion den comunidad y awe mi kier papia un tiki mas di esaki. E proyecto aki di Mangel Halto a cuminza na 2022 cu su fase1, cu tabata e palapanan, e gazebonan abao pa renovacion, y despues tambe nos a sigui cu e gazebonan aki riba, riba e baranca”, Tyson Lopez a menciona.
El a splica cu locual nan a traha riba dje como un palabracion cu e gobierno anterior, tabata pa renova locual tin.
“Tabata tin hopi palapa den deterioro, tambe nos a haya feedback di e comunidad aki banda cu nan kier pa nos drech’e p’asina e por mustra mas bunita.
“Durante e proceso aki enberdad nos a wordo acerca pa haci esun di e Clip, anto akinan ta na unda nos a bin cu diferente punto cu nos a bisa cu ta sumamente importante, pa nos considera riba dje. Esaki pasobra si wak bon, e palapanan cu tabata tin anteriormente, tabata den e lugar cu por ta no ta e mihonan pa naturaleza, y esaki tabata loke nos a tuma den consideracion e ora ey, pa bin cu siete puntonan cu nos a evalua.
E siete puntonan cu nos a evalua tabata eigenlijk, cu nos no kier pone ni un extra palapa, nos kier hacie menos palapa; den e caso aki, tin dos palapa menos cu anteriormente. E di dos punto ta cu nos kier pa kita tur loke ta adicional, poni rond; otro punto tabata con nos por hala e palapanan mas for di e costa, p’asina por duna matanan (kwihinan) e chens di crece bek.
Hopi di nan prome, tabata pega bao of banda di un kwihi, cada rato nos mester a corta kwihi p’asina no daña e palapa of pa mantene esaki. Tambe nos a papia di ban hala esakinan. Si bo observa bon, ora cu hendenan ta bishita e area sushi ta bula bay, y si bo ta cerca di e costa hopi lihe ta bay den e awa. Ban hala nan un tiki mas leu, pa e hendenan tin e chens di piki e sushi di e tera. E otro punto cu nos a evalua ta, eigenlijk, cu halando e palapa nos ta creando un bon espacio bek pa naturaleza, no solamente e matanan pero si wak riba e costa bo ta wak algun bubi, cu ta pahra di costa, y si bo tin tur cos cerca di e costa esey no ta e miho cos pa naturaleza.
Otro punto ta e foundering, hacie mas miho posible pa e futuro tambe pasobra manera a wordo uza anteriormente, a wordo poni un fundeshi pero nunca mas a drecha riba dje. Awo nos a dicidi di pone un fundeshi cu ta wanta pa biento pero tambe, pa despues, den futuro por kit’e y renov’e di biaha. Den e caso aki no tabata tey pero nos ta construi’e di tal manera cu despues nos por renov’e hopi bon”, director di ACF a declara.
