ORANJESTAD (AAN): Aruba College Fair Foundation (ACFF) a ofrece diaranson un conferencia di prensa na Impact Hub pa
comparti cu comunidad detaye di loke e College Fair di e aña’ki ta preparando pa ofrece su bishitantenan.
E evento ta uno cu studiante y mayornan ta warda riba dje cada pasa un aña ya cu e ta fungi como un herment util den scoge con pa avansa nan estudio. Den 2024, Aruba College Fair lo tuma luga diabierna 8 y diasabra 9 di november 2024, di 1:00 pm pa 7:00 pm, den Renaissance Convention Center.
“Ta e miho manera pa haya tur informacion y wak kico en berdad cada estudio ta encera pa asina evalua cua ta pas miho cu nan y kico carera profesional por tin den futuro,” esey President di ACFF, Muzaninn Wever a indica. “Aruba College Fair ta pa un y tur; studiante di EPB, MAVO, HAVO y VWO buscando un estudio di nivel MBO, HBO of WO; studiante di EPI of Universidad di Aruba cu kier continua cu nan estudio na Aruba of den exterior y hasta e profesional cu kier sigui avansa academicamente.” Pa edicion 2024, Aruba College Fair a confirma e participacion di institutonan di Hulanda, Merca, Canada, Centroamerica, Caribe y Aruba, ademas di companianan manera Hospital y WEB Aruba N.V.
E prome Aruba College Fair a tuma luga na 2000 como un iniciativa di ministerio di enseñansa, sinembargo a pas’e over na un fundacion pa sigura su continuacion despues di a ricibi hopi elogio for di e comunidad. ACFF ta un organisacion sin fin lucrativo cu e obhetivo di trece e mundo di institucionnan universitario y di educacion superior mas cerca di e studiantenan Arubiano. E ta brinda e posibilidad di haci pregunta directo na representante tocante e scol, e ciudad, e facultadnan, bida riba campus, etc.
