Aruba Bank ta orguyoso di contribui na patrocina Festival di Buki pa Mucha 2026

Contribuyendo cu Biblioteca Nacional

ORANJESTAD (AAN): Aruba Bank ta orguyoso di apoya Biblioteca Nacional Aruba cu dos donacion: un contribucion pa amplia su coleccion di buki cu letra grandi y un patrocinio pa Festival di Buki pa Mucha 2026.

   Como e unico biblioteca riba e isla, Biblioteca Nacional Aruba ta sirbi henter e comunidad cu material di lectura, tanto pa educacion como pa recreaccion. Cu e dos donacionnan aki, Aruba Bank ta contribui na  haci lesamento mas accesibel pa diferente generacion.

    Mas opcion di lectura pa adulto mayor: Buki cu letra grandi ta un necesidad importante den nos comunidad, mientras cu e coleccion actual di Biblioteca ta limita. E donacion di Aruba Bank ta yuda amplia e coleccion aki, ofreciendo adulto mayor mas opcion di material di lectura y mas oportunidad pa sigui disfruta di lesamento.

    Stimula lesamento serca nos muchanan: Adicionalmente, Aruba Bank ta un patrocinador orguyoso di Festival di Buki pa Mucha 2026. E festival ta forma parti di e esfuersonan di Biblioteca pa stimula lesamento serca muchanan di scol preparatorio y scol basico di Aruba, un di su metanan primordial.

Den cuadro di e celebracion di 75 aña di Biblioteca, Aruba Bank ta reconoce su contribucion na educacion y cultura di Aruba.

   Pa medio di ambos donacion, e banco ta apoya oportunidad pa tanto nos muchanan como nos adulto mayor sigui lesa, siña y descubri.