Aruba awe participando na final Teen Cultura Continental 2022

ORANJESTAD (AAN): Ashantee Martus ta actualmente na Tegucigalpa na Honduras pa competi den e certamen Teen Cultura Continental 2022.

   Ashantee na Juli aña pasa a participa pa Miss Teen Aruba International y a keda cu e oportunidad pa representa e isla na Honduras na e certamen, cu pa prome biaha ta ser organiza.

   Ashantee a biaha cu presidente y director nacional di MTAI George Winterdaal, su mama Miriam Contreras y tambe su preparador Endy Croes y Carl Quant.

   Durante e siman a tuma lugar diferente evento pre-eliminar manera Trahe di Baño, Trahe Nacional, Dansa Folklorico, Entrevista cu Jurado y mas.

   DIARIO a haya sa cu Ashantee a destaca masha hopi mes den cada presentacion y ta representando e isla dignamente na Honduras.  E Pre eliminar a tuma lugar Diabierna, y awe Diasabra ta e gran final.  DIARIO ta manda palabra di hopi exito na Team Aruba.