Aruba Airport Authority y Utilities Aruba a firma MoU pa explora solucionnan duradero pa e futuro di Aruba

ORANJESTAD (AAN):  Aruba Airport Authority N.V. (AAA), operado di Aeropuerto Internacional Reina Beatrix y Utilities Aruba N.V. a

firma oficialmente un Memorandum of Understanding (MOU), marcando e comienso di un esfuerso colaborativo pa explora solucionnan innovativo y sostenibel cu ta sostene e metanan ambiental y infrastructura a largo plaso di Aruba. 

E MOU ta refleha e compromiso comparti di ambos organisacion, hunto cu N.V. Elmar, W.E.B. Aruba N.V. y Aruba Waste Water Sustainable Solutions (AWWS), pa traha hunto den identifica oportunidadnan cu ta atende cu e demanda creciente di energia di aeropuerto mientras ta contribui na e ambicionnan di sostenibilidad mas amplio di Aruba. 

Como parti di e acuerdo, Utilities Aruba a expresa su boluntad pa coopera cu AAA pa explora solucionnan sostenibel pa expansion di capacidad energetico den futuro y maneho di energia na aeropuerto. E iniciativa aki ta particularmente relevante mirando e crecemento continuo di e aeropuerto y e plannan di desaroyo den futuro, incluyendo Gateway 2030. 

Di su banda, Utilities Aruba a pidi cooperacion di AAA pa sondea maneho sostenibel di awa y awa sushi y otro solucionnan cu por contribui na un mayor eficiencia y rendimento ambiental. Pa medio di e colaboracion aki, tur dos organisacion tin como meta pa evalua oportunidadnan cu ta sostene maneho responsabel di recurso y operacionnan sostenibel. 

E MoU ta establece un base pa un fase exploratorio caminda ambos partido lo conduci estudionan, comparti experticio y evalua e factibilidad di posibel iniciativanan. E areanan di enfoke ta inclui expansion di energia solar, strategianan di maneho di energia, alternativanan di tratamento di awa uza y otro oportunidadnan relaciona cu sostenibilidad cu por beneficia ambos organisacion y comunidad en general. 

Jonny Andersen, CEO di Aruba Airport Authority, a duna di conoce: “Como e porta di Aruba pa mundo, sostenibilidad ta keda un prioridad strategico pa nos aeropuerto. E Memorandum of Understanding ta refleha nos compromiso pa proactivamente explora solucionnan cu ta sostene nos necesidadnan di energia den futuro mientras ta contribui na e metanan ambiental di Aruba. Nos ta contento di por asocia cu Utilities Aruba den e esfuerso importante aki y ta spera di por identifica oportunidadnan cu ta genera balor a largo plaso pa nos isla.” 

Joseph Everon, Director Ehecutivo di Utilities Aruba, a agrega: “E colaboracion aki ta demostra e importancia di traha hunto pa atende e retonan di infrastructura y sostenibilidad di Aruba den futuro. Door di combina nos experticio y explora solucionnan innovativo hunto cu Aruba Airport Authority, nos por identifica oportunidadnan cu ta fortalece resiliencia di energia, eficiencia di recurso y maneho ambiental di Aruba.” 

Ademas di e areanan principal di enfoke, e partidonan lo explora tambe oportunidadnan pa comparti conocemento, iniciativanan di sostenibilidad den futuro, estudionan di factibilidad, proyectonan piloto y oportunidadnan di financiamiento potencial cu ta aporta na un desaroyo sostenibel. 

E firmamento di e MOU aki ta subraya e compromiso di tanto Aruba Airport Authority como Utilities Aruba pa fomenta partnershipnan strategico cu ta contribui na un Aruba mas sostenibel, resiliente, y cla pa futuro.