Aruba Airport Authority den colaboracion cu KPA a realisa ehercicio di emergencia

 *A enfoca riba aspectonan specifico di proceduranan di reaccion di emergencia.

ORANJESTAD (AAN): Aruba Airport Authority N.V. (AAA) ayera nochi a organisa un “Emergency Exercise” den colaboracion ku Korps Politie Aruba (KPA) na Aeropuerto Internacional Reina Beatrix. 

            E ehercicio aki a wordu organisa segun e documento di International Civil Aviation Organization (ICAO) y leynan local di aviacion di Aruba (AUA-AGA) ku ta delinea metodo pa asina test y evalua plannan di emergencia di aeropuerto, incluyendo un training parcial.

            E proposito di e training aki tabata pa evalua tempo di reaccion di KPA den un senario di emergencia. AAA a test sistema di notificacion di emergencia di aeropuerto, tempo di reaccion di Crisis team di AAA, setup di e Crisis team, asistensia di e “Emergency Response Team”, y tambe  e team di Seguridad pa cu asistensia y coordinacion di accesso y salida pa servicionan di emergencia. AAA ta usa e resultado di e tipo di entrenamento aki pa revisa y actualisa e manual di emergencia di aeropuerto.

            AAA ta gradici KPA pa e oportunidad di entrenamento y pa asina continua cu e bon colaboracion. AAA ta orguyoso di su team di boluntario cu a actua como victima den e ehercicio aki y tur colega y partners cu di un manera of otro a yuda pa hasi e training aki un exito.