Carolina Thiel-Span, Presidente:
ORANJESTAD (AAN)-- Un punto hopi relevante pa Fundacion Autismo Aruba, segun su Presidente Carolina Thiel-Span, ta e aspecto di comunicacion entre tur e personanan cu ta tuma parti den e cuido.
“Ora nos ta papia di personanan cu ta forma parti den e cuido di un persona cu cualkier limitacion, nos ta pensa riba cuido medico, cuido sicologico, pero riba mayornan y educadornan tambe.
Pa nos ta hopi importante semper pa promove comunicacion, di hecho den e Congreso tambe importancia di comunicacion lo bin dilanti. Nos ta haci esaki den tur nos congresonan; dus, yuda maestronan y educadornan, encurasha nan pa hiba combersacion na un forma positivo, p’asina nan ta habri pa comparti”, señora Thiel a señala.
El a sigui indica cu realidad ta cu door cu na Aruba ainda no tin tur e manehonan ‘in place’ cu ta asegura e proteccion di un studiante cu limitacion, y cu ta garantiza cu nan lo haya acomodacion razonable pa nan por ta den scol. “Tin ora nan ta sinti cu si mi ta bay comparti informacion aki e por bay na malo pa e studiante aunke scolnan lo por tuma algun paso cu no ta na bienestar di e studiante, hopi biaha nos ta wak cu no ta e caso. Educadornan kier yuda, e informacion ta pa nan yuda, pero e realidad ta cu tin suficiente caso pa e miedo ey ta funda”, Carolina Thiel-Span a señala.
El a splica cu e kiermen cu esaki, cu cada bez bo ta wak na diferente scol, cu ta crea manera un barera, un stop, unda cu e miedo cu mayornan tin y cu nan ta comparti cu otro, ta un miedo realistico, te ora cu e manehonan cu lo ta asegura cu lo tin e cuido necesario na scol, cu mayornan lo haya e sosten di scol, cu e educadornan lo haya tur e tools, bo no por garantiza cu e informacion ey lo no tin un efecto negativo.
E principionan ta pa no tin discriminacion, cu na momento cu un persona bira un educador, tin vocacion pa esaki, pasobra nan kier bon pa e studiante, pero e sistema no ta na e educador so, e ta parti di un scol, di un bestuur, anto eynan por tin diferente presion cu por tuma lugar. Asina e Presidente di Fundacion Autismo Aruba a trece dilanti.
