Aruba a ricibi bishita di President di New Caledonia

ORANJESTAD (AAN): Den marco di The 21st Overseas Countries and Territories – European Union Forum, Aruba a ricibi awe bishita oficial di Alcide Ponga Presidente di New Caledonia na Bestuurskantoor.

   New Caledonia ta un teritorio frances situa den parti zuid di Oceano Pacifico, cu ta consisti di varios isla, y cu tin un poblacion di casi 300 mil habitante.

   Prome Minister Mike Eman a ricibi e delegacion y a sostene un conversacion ameno, enfoca riba topiconan di interes comun entre ambos pais, incluyendo cooperacion dentro di e contexto di e paisnan y teritorionan cu tin relacion cu Union Europeo.

   Durante e encuentro, a intercambia punto di bista riba temanan relevante pa e region, manera desaroyo economico, turismo y sostenibilidad, retonan comparti pa teritorionan insular cu ta busca un balansa entre crecemento y proteccion di medio ambiente.

   E President di New Caledonia a expresa su admiracion pa e progreso di Aruba, particularmente den area di turismo y maneho di desaroyo sostenibel, destacando cu tin oportunidad pa intercambio di experiencia y aprendisahe mutuo entre ambos pais.

   Como parti di e bishita, e delegacion a haya tambe oportunidad pa aprecia e beyesa di Aruba for di e bista panoramico na tercer piso di Bestuurskantoor, reflehando e atractivo unico di nos isla.

   E relacion entre Aruba y New Caledonia ta basa riba respet mutuo y un historia di colaboracion dentro di e Overseas Countries and Territories (OCT). Den pasado, Prome Minister Mike Eman, den su rol como Presidente di OCTA, a bishita New Caledonia pa un encuentro oficial, fortaleciendo e lasonan entre ambos pais.

   E amistad aki a keda vigente te awe, y ta wordo aprecia ampliamente como un base solido pa continua dialogo y cooperacion.

   E bishita aki forma parti di e esfuersonan continuo pa mantene y profundisa relacionnan internacional, promoviendo colaboracion constructivo y intercambio entre e paisnan miembro di OCT-EU.