Aruba a ricibi 2 vehiculo nobo di Aircraft Rescue Fire Fighting

ORANJESTAD (AAN): Diaranson mainta, Minister Arthur Dowers, hunto cu Comandante di Cuerpo di Bombero Aruba,

a presenta oficialmente dos vehiculo Aircraft Rescue and Fire Fighting (ARFF) nobo na Brandweer Airport.  Nan ta di marca Rosenbauer, modelo Panther 6x6, y ta specialmente diseña pa atende emergencia relaciona cu aviacion.

   Nan ta forma parti di un compra di tres vehiculo ARFF, cu un inversion total di 8.488.483 Florin, cual dos vehiculo ta na Aruba mientras e tercer ta yegando prome cu fin di aña.  Cada vehiculo tin capacidad pa transporta 11.400 liter di awa, 1.600 liter di foam y 250 kilo di puiro pa paga candela.

   Durante e presentacion, Minister Dowers a enfatisa importancia di e inversion pa siguridad di Aeropuerto Internacional Reina Beatrix y pa capacidad operacional di Brandweer Airport.

   Cu e vehiculonan ARFF nobo, Gobierno ta fortalece preparacion y capacidad di responde di Brandweer Airport, mientras ta inverti den proteccion di pasahero, tripulacion, personal di aeropuerto y e bomberonan cu diariamente ta para cla pa actua.