Aruba a haya su St. Regis Resort cu elegancia incomparabel y gastronomia di clase mundial

Luhoso hotel a habri na Aruba...

• E prome St. Regis Resort cu servicio exclusivo den Caribe 

ORANJESTAD (AAN): Atardi na bahada di solo, oficialmente e resort di mas nobo na Aruba, esta St. Regis Aruba Resort a habri na Palm Beach.  El a bira instantaneamente un oasis dilanti lama diseña pa Hirsch Bender Associates. Como parti di e portafolio distingui di luho di Marriott International, e resort ta personifica e herencia rico y e ritualnan exclusivo di e marca, ofreciendo un vakantie unico riba e costa mas gusta di Aruba. E resort aki ta eleva e escena hotelero di e isla cu su elegancia refina, incluyendo e prome casino St. Regis y un restaurant riba dak dirigi pa e famoso Chef Akira Back.

   E resort nobo  ta conta cu 252 camber luhoso, incluyendo 52 suite diseña pa satisface e necesidad di e huespednan.

   “Aruba ta un di e islanan mas destaca den Caribe, y nos ta orguyoso di presenta The St. Regis Aruba Resort riba e beach precioso di Palm Beach, expandiendo ainda mas nos portafolio global di hotel y resorts legendario,” ta loke George Fleck a keclara, kende ta Vice Presidente Senior y Lider Global di Marca di St. Regis Hotels & Resorts. “Mientras nos ta sigui celebra 120 aña di elegancia clasico, nos ta sigui enfoca den e crecemento di nos portafolio di resorts, consolidando St. Regis como e simbolo definitivo di destino di luho y experiencianan unico.”

   Restaurantnan: E resort ta ofrece e huespednan seis experiencia culinario exclusivo cu ta celebra e sabornan exotico di e herencia multicultural di Aruba y mustrando e fusion culinario vibrante di e isla. E luganan aki ta presenta platonan innovativo y emblematico di e escena gastronomico. Den e curason di e propuestanan gastronomico ta e restaurant riba e dak, Akira Back, dirigi pa e famoso chef cu un strea Michelin, caminda e huespednan por disfruta di creaccionnan Hapones y Koreano mientras ta contempla un bista impresionante: un mescla harmonioso di smaak excepcional y paisahe fabuloso.

   E otro experiencianan gastronomico ta inclui Eskama, un restaurant mediteraneo dilanti di beach, y Nuba, un restaurant inspira den Aruba ubica banda di e piscina y beach. Ademas, e resort ta conta cu dos bar, The St. Regis Bar den lobby y Ventura den casino, ademas di un luga di koffie yama Grano Cafe. E resort tin tambe un ‘Astor Ballroom’.

   Manera ta un tradicion na tur propiedad di St. Regis, The St. Regis Aruba Resort ta conta cu su mesun version di un Bloody Mary, yama Bon Bini Mary, cu e huespednan lo por saboria den The St. Regis Bar.  Esnan cu sa historia di bebida, sa cu Bloody Mary a wordo inventa na St. Regis Hotel na New York.

   “Aruba ta, pa hopi tempo, un paraiso pa biahero cu ta busca vakantie excepcional y e spirito pionero y e tradicionnan legendario di St. Regis ta e combinacion perfecto pa e destino extraordinario aki,” ta loke Brian King a declara, e ta President di Marriott International pa Caribe y Latino America (CALA).

   “Un hotel St. Regis ta e cas maximo di celebracion, for di e ceremonia diario di champaña, te na e ritual di afternoon tea, nos ta entusiasma di trece e momentonan aki na e Aruba,” ta loke e gerente general Oliver Reschreiter di The St. Regis Aruba Resort a indica. “Huespednan por biba e cultura vibrante di e isla, disfruta di un gastronomia exkisito y experimenta e servicio legendario di St. Regis. Nos ta sigur cu The St. Regis Aruba lo converti den un berdadero icono di e hospitalidad di luho den Caribe.”