Aruba a haya elogio pa avancenan di diferente plan cu a wordo ehecuta of ta den ehecucion

Durante almuerso organisa pa Premier Mark Rutte

ORANJESTAD (AAN):  Diferente Lider di diferente pais a reuni siman pasa na New York pa e reunionnan di Asamblea General di Nacionnan Uni #UNGA78. Prome Minister Evelyn Wever-Croes a participa na diferente reunion y encuentro hunto cu Premiernan den Reino.            Diferente prome mandatarionan di diferente pais a atende e Asamblea General di Nacionnan Uni pa discuti temanan en comun y problemanan global.  

            Den un almuerso organisa pa Premier Mark Rutte di Hulanda, Prome Minister hunto cu diferente Hefe di Estado di paisnan similar manera SIDS, a elabora riba diferente ‘Best Practices’ enfatisando e importancia pa e demas paisnan sa loke cada un ta haciendo riba e tereno aki.

            Prome Minister a remarca cu den e encuentro aki tambe Aruba a haya varios elogio pa su avancenan di diferente plan cu a wordo ehecuta of ta den ehecucion y compromisonan a wordo haci pa sigui traha hunto.

            “E tabata un siman exitoso y fructifero pa Aruba y nos lo traha hunto y duro pa pronto esaki por traduci su mes tambe den proyectonan cu nos por finalisa na Aruba. Pa mi e ta un honor y orguyo di por representa mi dushi Aruba riba tarima internacional”, Prome Minister a expresa.

            Den e encuentro di almuerso tabata presente Premier di Cabo Verde, Premier di Sint Vincent and the Grenadines, di Mauritius, Antigua y Barbuda.