Aruba a extende convenio cu Camara de Comercio Colombo-Holandesa “Holland House” na Colombia

Minister Wever:

ORANJESTAD (AAN): Minister Geoffrey Wever a extende e convenio cu Holland House na Colombia, cual ta un e di e Camaranan di Comercio Bilateral mas grandi na Colombia.

Desde inicio cu a sera e prome convenio na 2023 cu Holland House diferente companianan local ja caba a worde asisti pa crea link nan cu companianan Colombiano.

Asina aki na 2023 Minister Wever hunto cu DEZHI a organiza un trade mission exitoso pa Colombia cu ayudo di Holland House Colombia. Un parti essencial di e trade mission aki tabata pa ta logra trece carni for di Colombia pa Aruba. Awe orguyosamente por bisa cu tur e rekisitonan pa realisa ta casi cla y pronto lo por cuminsa importa carni for di Colombia

   Por mira back cu esaki a resulta den un contribuicion positivo pa entre otro nos economia di Aruba door di expande e netwerk comercial.

   Manera nos sa Aruba su economia ta uno chikito y ta depende riba importacion di mayoria di productonan. Cu un posicion strategico den Caribe entre Merca y America Latino ta esencial pa sigui explora oportunidadnan comercial cu ta na beneficio di nos comerciantenan y consumidornan. P’esey ta sumamente importante pa sigui intensiva e relacionan economico cu paisnan den region. E relacion cu Colombia tin cu Aruba ta uno esencial mirando e cercania y e potencial pa haci diferente tipo di negoshi.

  “Holland House Colombia a demostra di ta un instrumento esencial pa nos epresarionan local, pa es motibo a extende e convenio pa asina por sigui facilita negoshi y inversionnan entre Aruba y Colombia. E maneho economico y vision di nos ministerio ta pa nos sigui pusha pa nos companianan local nan sigui crece y busca oportunidad nan pa asina nos consumidornan tin mas acceso na productonan na prijsnan mas bentahoso, y asina reduci costo di bida na Aruba”, segun minister Geoffrey Wever.

   Minister Wever kier a gradici e team di Holland House pa e trabao nan ja desplega como tambe e team di DEZHI pa logra na un acuerdo pa asina extende e convenio entre Aruba y Holland House Colombia.