Aruba a comete un eror grandi door di no mantene instalacionnan di refineria

 Segun Hose Figaroa di FTA:

ORANJESTAD (AAN): Segun Hose Figaroa di FTA, den un entrevista recien a declara cu por ta Aruba a comete un eror grandi door di laga e instalacionnan di refineria bay hopi atras den e ultimo añanan contrario na Corsou cu si tabata cla pa ricibi crudo mesora pa almacena. 

Pa haci esaki na Aruba, den e condicion cu e tankinan ta den, lo tuma hopi tempo y placa pa opera pa almacena so. Esaki, segun el a bisa, lamentablemente ta un desventaha cu Aruba tin cu e scoge pa no mantene por lo menos e parti pa almacena pa asina e por cuminsa opera mesora den caso cu haya oportunidad. 

“Esaki lo ta oportunidadnan cu tin eyfo. Lo ta un eror pa nos como pais enfoca riba un solo oportunidad mientras cu otro pais den Caribe ya ta almacena crudo. Nos no por laga e posibilidad aki un banda y tampoco por tarda cu ne pa ora cu tuma e decision pa cuminsa cu esaki, e competencia ta asina grandi eyfo, cu no ta bal e pena mas. Nos mester ta proactivo, aunke nos ta laat caba, pero ainda nos por purba pa haci uzo di e oportunidad aki”, el a enfatisa.