Artistanan di Aruba a logra exito grandi na Fuze Art Fair na Bahamas

ORANJESTAD (AAN): Artistanan cu a representa Aruba na e asina yama “Fuze Art Fair 2025” na Bahamas,

a consisti di Romelinda Maldonado, Nuris Lampe, curador artista y organizador Elvis Lopez, e team excelente di Ateliers '89 Punto Di Beyas Artes Aruba.

   Nan a regresa recien hopi contento cu e gran exito cosecha na Fuze Art Fair den e compleho hotel di Bahamar na Nassau, cu a tuma lugar entre 22 pa 26 di October 2025.  Nan a pone Dialuna 21 di October como e unico dia pa por instala e obranan di arte di e artistanan representando Aruba y Ateliers '89. Tur esaki mas liher a posibel y mihor cu por, basa riba un idea fiho di su curador.

   E exposicion tabata den e hardin exterior di e hotel. E diferente boothnan tabata den un tent enorme pa e exposicion aki den e espacio gigante, cu shopping mall, restaurant, cafe, salanan di conferencia, ballroom, piscina, discoteca,  aquarium, tur formando e compleho hotel yama Bahamar.

   Unda Fuze a usa paden di e hotel pa e demostracion di e parti culinario y su hardin pa e presentacion di e art fair. Un Hotel gigantesco bunita di tres toren. Unda tur participante a hospeda gratis, incluyendo pasashi y cuminda gratis.

   For di principio e interes pa Aruba tabata impresionante.  Pero e representante nunca a spera riba un acohida asina grandi. Cu Aruba su obranan di arte di calidad halto, diferente y avansa den conparacion cu e otro islanan di renombre di arte caribense, a haci cu e creacion di nos booth su presentacion e exito inmenso cu a worde logra.

   Cu e experencia di tanto aña ta presentando Fuze, e boothnan, galerianan, institutonan di arte y museo, tabata limpi bunita y excelente.

   Na banda di e art fair ta tin e culinary art fair. Un evento riba su mes paralelo cu e artfair. Esaki su presentacion den e pasiyo di e hotel paden a sa di atrae hopi bishitante cu na mesun momento a bishita e art fair. Un evento bon pensa pa atrae mas publico cu por pa mira arte .

   Sorpresa di mas grandi tabata e bishita di e conocido cantante Mericano, Lenny Kravitz na e art fair. Y cu despues a haci un tremendo presentacion durante un fiesta di aperetura sin igual den e hardinnan di Bahamar. Un gran fiesta sigur e art fair tabata. Un momento inigualable di por mira tur e artista nobo. Saluda y combersa cu esunnan cu a expone cu nos hunto pa añanan largo. Of esnan cu a bin den residencia na Ateliers '89.

   Of, durante e programa di Ateliers '89 yama Caribbean Linked. Cu tur e curadornan, galeristanan publico presente na Fuze a crea un ambiente unico, alegre y ameno.

   Na final e exito di nos presentacion ta debi na e obranan genial cu nos na prteneta manera e pinturanan di Nuris Lampe. Cu a sa di cosecha admiracion sin igual. Sin kita afor, Romelinda Maldonado su sculturanan excelente cu a genera comentarionan hopi positivo.  Nan mes instalando booth y colgando e obranan. Pero a yena nan cu hopi satisfaccion di por demostra kico por na Aruba.

   Elvis Lopez kier a gradici tur cu a yuda pa por a logra e gran logro aki pa Ateliers '89. Su ruman muher Odalis Lopez kende a traha tur su trabaonan di tela anochinan laat y muy en especial, un shout out grandi pa Romelinda Maldonado, Nuris Lampe, kendenan a sa di demostra nan talento sin igual. Tambe na Cine Aruba Adriano Nanof, fundacion Ateliers '89. Y e sorpresa y e cos di mas great cu a pasa ta cu Ateliers"89, inmediatamente a worde invita pa bolbe participa na e siguiente evento di Fuze Art Fair.

   Danki tambe na Gobierno di Aruba, Cultuurfonds Caribe, Unoca, La Cabana, Setar NV, Ahata, H and H Wine y tur otronan cu a sostene nan durante e ultimo aña sosteniendo e programa  anual na Ateliers '89, cu a sa di crea nos artistanan actual.

   Riba potretnan por mira Romelinda Maldonado trahando duro cu su obranan, letranan di chance ainda sin instala.  Tambe Pinturanan exitoso di Nuris Lampe na muraya, siguinte potret publico grandi.  Tambe por mira Elvis Lopez ta pose cu famoso cantante Lenny Kravitz.