Apertura awe, Diabierna 13:
ORANJESTAD (AAN) — Awe tin un anochi special cu apertura di e exposicion “Balor di nos piscadornan”, di e artista plastico Mario Carrera. E apertura di e expo aki lo tuma lugar na UNOCA, anochi di 7 pa 9’or, y e lo wordo haci door di Minister di Enseñanza y Deporte Endy Croes y Ivan Kelly Jr., di Tele Aruba.
“Esaki ta un exposicion inspira pa Dios. Na 2012, Dios a inspira mi pa mi cuminza pinta. Mi prome expo tabata na 2013 y diez aña despues mi di dos expo. Mi mes tabata piscado prome cu mi a haya un accidente cu a laga mi limita di mi movecion. Mi tin un aprecio inmenso pa nos piscadornan, cu hopi bez ta wordo critica pasobra nan ta bende e pisca caro, pero tin hende no ta pensa riba tur e sacrificio cu nan ta haci y peligro cu nan ta pasa aden, pa nos pueblo come pisca fresco”, Mario a expresa. E pintor tin un historia doloroso pero alavez un contesta di FE, cu a surgi prome cu el a pinta pa prome biaha.
