Artista plastico Belinda de Veer ta presenta su exposicion “Kimera” na Cas di Cultura

ORANJESTAD (AAN) — E artista plastico, Belinda de Veer, den entrevista cu DIARIO a elabora tocante e exposicion cu ta presentando den Cas di Cultura, titula “Kimera”.

Ta trata aki di obranan cu el a traha durante e ultimo dos añanan, y e ta bay keda habri te cu dia 2 di Juni proximo. El a expresa su gratitud grandi cu Cas di Cultura a brinda e espacio pa su expo, y tambe e ta gradici Cultuur Fonds pa yuda sponsor.

            Papiando tocante e tema di su exposicion, el a splica cu “Kimera” ta un tema cu ta trata di algo hopi importante pa tur hende, manera amor, deseo, etc.

“Semper mi ta pinta mas den perspectiva di hende muher, e ta hopi intuitivo y esaki tambe ta un exposicion asina. Mi a traha cu collagenan di otro obranan cu mi tin caba, pues e ta extra diferente di loke mi tin”, e artista a menciona.

            El a agrega cu e ta inspira den amor, erotismo, complehidad di relacionnan. “Ora hende ta den e tema di amor, tur bo conocimento y bo pasado ta drenta aden, p’esey mi ta yam’e ‘kimera’. Kimera ta, eigenlijk, un figura mitologico di diferente partinan di animal: cabes di lion, curpa di cabrito, rabo ta un serpiente, y door cu e tema aki ta amor y relacionnan, mi a yam’e ‘kimera’ pasobra e tin e banda positivo pero tambe tin e banda negativo, miedonan cu ta brota den e sentimentonan. Dus, esey ta e base di e exposicion aki”, Belinda de Veer a duna di conoce.