Artista local Natusha Croes a anuncia su debut musical cu e lansamento di E'Mantra

ORANJESTAD (AAN):  Diabierna ultimo, durante un conferencia di prensa e artista Natusha Croes,

kende artisticamente ta anuncia su debut bao di e nomber 'Caricia', a duna di conoce cu e ta bay ta lansando su produccion musical E' Mantra cual ta un EP (extended plataform).

            El a bisa cu pa 1 di Augustus lo tin e estreno pa medio di e plataforma di streaming y pa asina lo tin un concierto den e Expo Hall di Cas di Cultura.

            Pa loke ta e EP, el a laga sa cu esaki ta consisti di 7 cancion: Manifesta, Sondeo, Rosea, Sentido, Suspira, Ritmo y Rikesa.  Ta trata di 7 cancion na Papiamento. Un playlist acompaña cu visualnan crea pa asina refleha e buskeda pa e poder pa asina surpasa cualkier reto y asina manifesta e potencial cu ta biba den nos, Croes a expresa.

            E' Mantra ta un produccion exkisito di cual ta caba Natusha Croes (Caricia) a haci su lansamento durante un presentacion special: E'Mantra Experience.

            Natusha a splica cu a tuma tres aña pa e por a yega na e diseño di e EP aki. E ta totalmente un inspiracion poetico  cu mescla di zonidonan moderno, pero tambe folklorico, tambu y te hasta genero urbano.

            E concierto special aki lo tuma lugar na Cas di Cultura riba Diamars 1 di Augustus di 8 pm pa 9 pm.

            Natusha Croes tin un Bachelor den Fine Arts y un Master den Performance Making. Su tata tabata Hildward Croes, den feliz memoria.

            Recientemente, Nastusha tambe a anuncia e yega di su prome baby hunto cu pareha Jake. Masha pabien Natusha.