Artesanonan por haci entrega di tur material nobo cu ainda no tin Seyo Nacional di Artesania na DCA

ORANJESTAD (AAN)- Departamento di Cultura Aruba (DCA) conhuntamente cu e Comision di Seyo Nacional di Artesania Aruba ta participa

na artesanonan cu por haci entrega di tur material nobo cu NO tin Seyo Nacional di Artesania ainda na DCA. 

            E luna aki riba dia 23 di februari 2022 lo tuma luga nos prome evaluacion pa e aña aki, caminda e comision ta bini hunto pa pasa riba tur e criterianan necesario relaciona cu e producto pa bini na remarca pa e Seyo Nacional di Aruba.

Bo contribucion y participacion ta un oportunidad bunita pa enrikece nos industria creativo. Y ta haci un yamada na e artesanonan pa entrega tur nan producto nobo no mas tarda cu dia 21 di februari 2022 prome cu merdia na oficina di DCA.

            E proceso di aplicacion ta tuma luga na Departamento di Cultura Aruba na John F. Kennedy Educational Center cu ta keda na Stadionweg # 37, Oranjestad Aruba, (retonde banda di Cas di Cultura).

P’esaki mester *yena e formulario di aplicacion, *mester trece un identificacion valido, *un pasfoto, *como tambe un comprobante di adres.

Criterianan pa bini na remarca di un Seyo Nacional di Artesania Aruba ta:

• Mester ta traha na man. (No cu machine, pero cu herment manual

  senciyo).

• Autentico, Diseño Original.
• Consistencia den (re-) produccion di diseño y modelo.
• Grado di experticio (tradicional) den trahamento di e producto.
• E producto mester ta traha na Aruba.
• Grado di uzo di material local.
• Grado cu e producto ta refleha tecnicanan di artesania tradicional.

            Artesania ta un arte caminda cu creatividad den forma di e arte y cultura ta haya bida. Ban sigui enrikece y contribui na nos productonan artesanal local. Y aporta na nos industria creativo.

            Ta danki na contribucion y participacion di nos artesanonan cu mas y mas nos tin obranan artistico local y di Aruba mes.

            Cultura nos mester bib’e.