Desaroyo Sostenibel aplica na e arte fotografico ---
ORANJESTAD (AAN): Varios artista visual di Aruba tabata tin e oportunidad di forma parti di e exposicion 'Caribbean Dialogs' cual a tuma lugar siman pasa na Talk of The Town Hotel' unda a instala e asina yama 'Aruba Photo Room'.
E expo aki tabata posibel danki na e colaboracion entre TOTT y Art Museum of the Americas (AMA) di e Organisacion di Estadonan Americano (OEA) cu sede na Washington D.C. y cu a conta cu e sosten financiero di Prince Bernhard Culture Funds Caribbean Foundation.
E artistanan privilegia cu a haya e posibilidad di expone nan creacionnan fotografico tabata Damilice Mansur (Aruba), Fernando Vermeer (Aruba), Rafael Barragan (Venezuela) y Darlin Quiroz (Colombia). Como Curator a resalta e presencia di Fabian Concalves Borrega, Co-Curator, Renwick Heronimo y como Coordinador di e exhibicion, Eva Gonzalez.
INICIATIVA
DIARIO a combersa cu Fabian Concalves Borrega ken a conta cu e idea di e exhibicion aki a surgi durante un reunion na Washington D.C na e foto-galeria di e Museo di Arte di Las Americas, cual e ta maneha.
A combersa riba e posibilidad di bin cu e iniciativa di habri un espacio dedica na fotografia y arte basa den fotografia na Aruba, a bisa.
DESAROYO SOSTENIBEL
Na e museo tin e espacio di fotografia cu ta parti di un di e pilarnan di OEA: Desaroyo Sostenibel. Kico desaroyo sostenibel ta significa den arte? Concalves a remarca cu esaki kiermen purba di haci algo cu ta bay yega na e publico den un forma sustentabel.
El a splica cu e potretnan cu ta wordo exhibi na e murayanan, por ehempel no tin lijshi, no tin glas, ta copianan di exhibicion cu a wordo autorisa door di e artistanan pa medio di un contrato/licencia di produccion pa mustra e imagennan den e espacio virtual y mescos ta sosode cu e imagennan cu ta wordo mustra pa medio di e pantayanan di TV. E copianan cu ta wordo imprimi no tin balor comercial, a remarca, pero ta pertenece na e museo.
Concalves a sigui bisa cu esaki ta permiti nan transporta algun impresion den forma economico, sin paga seguronan, ya cu no tin balor. Nan tin un costo di impresion, pero no tin ningun balor ya cu no ta obranan original.
Nan ta transforma den obranan original ora cu e artista ta manda un certificado di autenticidad. E museo ta funciona como un laboratorio y ta bende un copia atravez di e 'AMA Shop' cu por adkiri ora di scan e QR Code.
CARIBBEAN DIALOGS
E exhibicion aki ta conforma di dos tema: 'Caribbean Dialogs' y 'Southern Dialogs'.
El a splica cu e region di Caribe ta wordo considera un zona di convergencia, unda a asimila y transforma diferente influencia cultural a lo largo di cinco siglo di colonizacion.
Comercio, cu a facilita e desaroyo y e explotacion economico di e region aki, a trece cu ne rutanan comercial cu a transporta pueblonan y culturanan di tur parti di mundo, locual a crea e sociedad hibrido di awendia.
A pensa riba e iniciativa aki for di un perspectiva renova. E dialogonan visual di e artistanan, e narativanan inter-conecta cu otro den e asina yama 'dipticonan" cu ta permiti visualiza e afinidad di e regionnan caribense cu e ekilibrio di e diferencia y e creacion di realidadnan nobo den e imagen di e espectador, e curator a señala.
'Caribbean Dialogs' a permiti esaki. Captura cu e lens di artistanan, momentonan specifico, unda ta resalta e dignidad humano y e comprension regional cu enfoke den e tema di e migracion.
"Den e caso di Aruba, mescos cu den e caso di Chile y Argentina, nos a busca arubianonan descendientenan di latino. Un venezolano y un descendiente colombiano y arubianonan, descendientenan di otro comunidadnan, Mansur y Vermeer. Dos artista latino, Quiroz y Barragan, a dialoga cu dos artista, Mansur y Vermeer", a expresa.
SOUTHERN DIALOGS
'Southern Dialogs' ta un serie di potret cu a wordo geprint y exponi riba e muraya. Ta trata di e trabao di 11 artista di Chile y Argentina cu a basa nan obra den paisahenan y nan influencia, trabaonan artesanal y comercio den extincion, formanan precario di biba, aislamento, entre otro.
E prints aki ta e di dos biaha cu ta wordo exhibi. Nan a wordo presenta na e feria di arte di Los Angeles recientemente y esaki ta e di dos biaha cu ta wordo exhibi, e biaha aki na Aruba. Nan lo wordo exhibi na Mexico y probablemente na New York, semper teniendo na cuenta e principionan di desaroyo sostenibel cu a wordo menciona anteriormente, Fabian Concalves a enfatisa.
EXPOSICIONNAN VIRTUAL
Ta importante pa menciona cu e dos exposicionnan aki a wordo crea pa e ambiente virtual, pa e rednan social ya cu durante Covid, e cuarentenanan cu a extende durante casi un aña y mey, e 'lockdowns', etc, a trece cu ne cu mester a innova y haci esaki den forma virtual pa por a yega na e publico.
Pa esaki a traha un 'script' cu e publicacionnan cu lo wordo haci tur dia, Fabian Concalves a duna di conoce.
Finalmente el a laga sa cu esaki ta e di tres exhibicion cu nan ta organisa y cu a wordo treci Aruba for di Washington D.C. y ta e prome exhibicion di artistanan local/arubiano.
