Area natural di Isla di Oro a wordo traspasa pa ACF pa mitiga cualkier impacto cu por presenta riba e naturaleza eynan

Tyson Lopez director di ACF:

ORANJESTAD (AAN) — Director di Aruba Conservation Foundation (ACF), antes Fundacion Parke Nacional Aruba,Tyson Lopez, den un entrevista cu DIARIO, a indica cu na aña 2019, FPNA a haya e mangrove y awa di Isla di Oro, pa cuminza cu parke marino; y despues, na 2020 nan a haya e area di mangel cu a bira areanan proteha, unda gobierno a traspasa na e fundacion awo yama Aruba Conservation Foundation, pa maneha e aspecto natural di e area aki.

            Lopez ta splica cu e area aki ta importante pasobra e ta un area halto, y un di e areanan cu tin menos impacto riba e area marino y tambe terestre, p’asina purba di mitiga e posible impactonan cu por bin dilanti.

            “E ultimo decadanan no tabata tin no tabata tin ningun actividad comercial mas riba e area aki, locual a haci cu e area aki a haya su descanso pa por a recupera. E ta un di e partinan mas saludable, aunke no full, y tambe pa e naturaleza e area aki a bira manera un refugio pa sigui biba y reproduci su mes pasobra tur otro caminda tin desaroyonan ta pasando”, Tyson Lopez a señala.

            El a reitera cu eynan ACF ta purba di mitiga cualkier tipo di impacto cu por presenta den futuro, manera sea via e bida marino, e mangelnan, problema di luz of awa di riool, of diferente impacto cu por trece cu ne cu e calidad di e medio ambiente eynan, ta bay degrada.

            “Esey ta di importancia pa nos como Fundacion di Conservacion. Nos tin un tarea firma cu gobierno cu nos ta haci esey den nos trabao, y nos ta haciendo nos trabao pa ta sigur cu nada lo pasa cu e area aki”, Tyson Lopez a reitera.