ORANJESTAD (AAN): Diasabra dia 25 di januari venidero, Archivo Nacional Aruba lo ta habri pa publico di 10.00 am te cu 2.00 pm pa brinda publico e oportunidad di bishita e exposicionnan aki.
Expo 1: “Flashback Fiesta”, cu tabata tin su apertura aña pasa na maart. Pronto e exposicion lo worde desmantela pa asina traha riba e siguiente exposicion na maart.
Expo 2: Esaki di arte: “Imagennan cu a Disparce”, di Olga van der Klooster
Architectuur- en cultuurhistoricus (RUG en UVA); Beeldend kunstenaar (Kunstacademie Minerva, Vrije Kunstacademie Haarlem).
“Coleccion Aruba ta un fuente rico di inspiracion pa mi proyecto di arte ‘Imagennan cu a Disparce’. Mayoria di e escenanan riba e panelnan aki ta inspira pa e bunita potretnan di studio di e fotografo Arubiano Venancio (Chonai) Francisco Boekhoudt. Mi kier refleha/mustra e imagen di tempo, e posicion social di e hendenan fotografia y tambe nan postura cu ta tin biaha incomodo, timido of hopi orguyoso y determina di e figuranan. Nan no tabata custuma di pose dilanti di un camara e tempo ey.
Esaki ta duna e potretnan algo conmovedor. Mi a purba di captura e momentonan aki. Mi no a pinta nan cara conscientemente, pa asina nan postura hala mas atencion. Asina nan sintimentonan ta worde expresa: den e posicion di nan pia, scondi tras di un tas grandi riba nan scochi, un man robusto na banda, teniendo un flor, mesa of tas. Tur e potretnan di Chonai Boekhoudt ta na preto y blanco.
Mi a pinta e escenanan conscientemente na color pa enfoca e ambiente Arubano nostalgico manera mi tabata conoce tempo cu mi tabata mucha den añanan sesenta: flornan artificial colorido den un vaas, mucha muhe bunita cu mea y sapato blanco y bisti cu shimis, hende muhe adulto den shimis Mericano cu flor imprimi y bunita decora cu cadena di perla y rench’i orea di perla di Spritzer y Fuhrman, y e hombernan den trahenan na midi. Mi a cuminsa cu e proyecto ‘Imagennan cu a Disparce’ na 2024 na Hulanda. E presentacionnan ta riba lona cu ta midi 1 meter pa 80 cm. Nan a worde exponi na november durante e Haarlemse Kunstlijn den Galerie De Waag na Spaarne y lo worde exponi atrobe na Heemsteedse Kunstbeurs”.
Expo 3: “E bunitesa di e naturalesa Arubano”, Olga van der Klooster
E tapijt ‘E beyesa di e Naturalesa Arubano’ ta traha di papel cu ta traha di carton di caha di webo cu imagen di e blachinan di e matanan di Aruba. Algun di e matanan ta di especienan nativo, manera matanan di Bushiribana; e otro parti, mescos cu e Tuturutu, a worde introduci na e isla hopi tempo pasa y a plama naturalmente riba e isla. E tapijt no ta inclui especienan cu eventualmente lo desplasa matanan nativo y natural. E palo di Neem, por ehempel, ta un especie invasivo cu eventualmente lo plama riba e isla. Por haya hopi informacion tocante especienan di mata y mata cu ta worde haya na Aruba den e archivonan di ANA.
Expo 4: Di nos heroe Nacional d.f.m. Boy Ecury. E exposicion ta recorda cu 80 aña pasa, e hoben Segundo Jorge Adelberto Ecury, miho conoci como Boy Ecury a perde su bida den e lucha pa libertad di Hulanda durante e Segundo Guerra Mundial. Pa e ocasion aki Gobierno di Aruba a decreta e fecha 6 di november como “Dia Nacional pa conmemora tur luchador di Resistencia Nacional y den Reino”.
Boy Ecury tabata un luchador di resistencia Hulandes y a worde fusila door di e Alemannan dia 6 di november 1944. ANA su coleccion di Boy Ecury a worde amplia dia cu e vuida y yiu muhe di d.f.m. di Ted Schouten, un subrino di Boy Ecury a trece diferente album cu potret y articulonan di corant colecciona pa Sr. Schouten y tambe algun pertenenecia di Dundun Ecury, manera buki, album, potret y carta, cual mayoria ta bay tocante di Boy Ecury. For di e materialnan por saca afo mas di e bida di Boy Ecury despues di lo sucedido y por wak e for di e perspeciva di famia y haya mas detaye di diferento suceso cu a tuma luga.
E prenda mas special cu ANA a ricibi for di e famia ta e “verzetskruis” (cruz di restistencia), un medaya cu a worde entrega na e famia como honor na e lucha di Boy Ecury pa e libertad di Hulanda. Tambe e ultimo carta “wilsbeschikking” skirbi pa Boy Ecury prome cu e a fayece y e carta cu Reina Wilhelmina a skirbi pa e mayornan di Boy.
E famia tabata tin tur e materialnan aki warda na Hulanda y cu e fayecimento recientemente di Sr. Ted Schouten su vuida y su famia a dicidi di traspasa e pertenencianan aki na Aruba.
E “verzetskruis” a worde entrega na Pais Aruba diaranson 6 di november na Prome Minister di Aruba Señora Evelyn Wever-Croes, pa despues worde warda y exhibi na Archivo Nacional Aruba.
Dia 25 di januari, Dia di Betico Croes, nos ta spera bo na Archivo Nacional di 10.00 a.m. pa 2.00 p.m. pa aprecia e exhibicion aki.
