Archivo Nacional Aruba a duna bon presentacion na Conferencia di ACURIL

ORANJESTAD (AAN): Dianan 8 te 12 di juni 2025, a tuma lugar na Curaçao e di 54 Conferencia di ACURIL (un conferencia pa profesionalnan riba tereno di biblioteca,

archivo y museo den Caribe). E aña aki e titulo di e conferencia tabata “Digital Humanities: connecting the Caribbean through archives, museums and libraries”.

  Durante e conferencia aki, Archivo Nacional Aruba tabata bon representa pa su team dinamico cu a duna diferente presentacion di e trabounan cu ANA ta eherce den e area di digitalizacion, accesibilidad y sostenibilidad di e herencia digital. Digitalizacion ta un siguiente stap den e maneho di nos herencia, y cu technologia digital ta crea hopi posibilidad nobo pa colabora. Semper e aspecto humano ta keda importante y technologia no ta re-emplasa esnan trahando riba tereno di preservacion y conservacion di herencia cultural, entre otro den biblioteca, archivo, museo y arte.

   Riba invitacion di ANA e CEO di Read-Coop, Sr. Andy Stauder a viaha for di Austria especialmente pa sera conoci cu e team di ANA y pa duna un presentacion na ACURIL tocante su organisacion. E organisacion cu ta responsabel pa e software Transkribus, cu ta uza technologia di Inteligencia Artificial pa por reconoce escrito na man (Handwritten Text Recognition).

   E team di ANA a duna den total 4 presentacion! Raymond Hernandez y Shakira Croes a duna un presentacion titula: Beyond the Digital Bubble: Keeping Archives Human in a Digital World – Durante e presentacion Raymond Hernandez a duna un bista di e diferente proyectonan digital cu ANA ta ehecuta y cu proyectonan nobo cu ta na caminda. Tambe a elabora riba e proyectonan di digitalisacion y accesibilidad di informacion y documentacion, proyecto di HTR y e colaboracion extenso cu Biblioteca Nacional Aruba pa conecta e coleccion digital pa facilita e usuario yega na e herencia documental di Aruba. Shakira Croes a expresa con importante e ta pa mantene e aspecto humano y con ANA ta keda bin cu proyecto pa keda cu e aspecto humano. Tin hopi proyecto riba e tereno di technologia avansa pero no por kita e parti humano di dje, cual ta envolvi e communidad di Aruba y diaspora den conservacion di nos herencia cultural.

   Edric Croes hunto cu colega Peter Scholing di BNA a duna un presentacion titula: Reconstructing Caribbean Identities: Archives and Libraries Unlocking Historical Data, Creating Digital Tools for Migration and Ancestry Research. A combina diferente fuente for di biblioteca y archivo pa por conta (hi)storia di persona su bida.

   Johny van Eerden y Arliene Geerman a duna dos presentacion hunto cu Andy Stauder di Read-Coop titula: Historical Documents and AI: Transkribus as a Universal Platform to Unlock History. Andy Stauder a demostra e uzo di e software Transkribus, e uzo, y dicon e aspecto humano ta keda relevante y importante awor y den futuro pa por aplica e technologia. Johny van Eerden a duna un splicacion di e transformacion cu ANA a pasa e ultimo añanan desde cu a inicia cu Transkribus. E uzo di technologia ta crea hopi posibilidad nobo pa expande y conecta informacion pa por conta nos (hi)storia. A discubri diferente storianan danki na e uso di technologia moderno di reconocimento di manuscrito. Pa conclui e presentacion Arliene Geerman a demostra e uzo di Transkribus pa e grupo presente y a logra inspira otro persona pa traha hunto pa asina nos por conecta mas informacion cu ta warda den nos archivonan riba otro isla, y otro pais rond mundo.

   Pa e ekipo di ANA e bishita na e conferencia di ACURIL tabata exitoso y Aruba tabata bon representa y a resalta pa e trabounan cu ta haciendo riba e tereno digital y digitalisacion. Aruba por ta orguyoso cu riba e tereno di digitalisacion sigur nos ta un pionero den e area di Caribe.

   Pa por a participa na e conferencia aki, nos kier a gradici Gobierno di Aruba, Fundacion Amigonan di Archivo y Cultuurfonds Caribische Gebied, fonds DIGITALL cu a aporta pa e participacion na e conferencia di ACURIL 2025.