FMVTBV ta invita henter comunidad pa bisti na blow dia 11 di April:
ORANJESTAD(AAN) — Señora Lisette Gomez, fundador di e Fundacion “Mi Voz ta Bo Voz” (FMVTBV) a yama un rueda di prensa, tocante e tema di Luna di April, cu ta un luna cu recientemente a wordo decreta pa Gabinete Wever- Croes, como “Luna di Prevencion y Concientizacion di Abuso di Mucha”.
Lisete a menciona cu Fundacion Mi Voz ta Bo Voz, tin mas of menos 4 aña di lanta, pa uza e luna aki pa pone un dia special pa e comunidad di Aruba bisti na blauw p’asina nos por inculca den dje e motibo pa haci esaki, vooral cu nan tin mas cu 15 aña caba, riba e lucha aki di abuso sexual di mucha.
“Nos kier pa cuminza cu e parti preventivo ta un poco mas fuerte den e comunidad y e parti di concientizacion pa mayornan y henter pueblo por compronde kico abuso sexual ta y ki efecto tin pa nos muchanan y pa e comunidad di Aruba.
“No tin un fecha fiho pasobra tur aña e fecha ta cambia, y e motibo di esaki ta Semana Santa, dus e dianan liber, y e aña aki, e dia pa bisti na blow ta Diabierna 11 di April. Nos ta pidi comunidad di Aruba, scolnan, oficina of cualkier persona individual cu kier doemee cu e proyecto aki, pa e dia aki bisti na blauw. Bo ta saca un selfie, un potret di grupo, por ehempel. Na nos scolnan cu ya caba un par di aña ta doemee, p’e muchanan tur bisti na blow, y manda e potret na 562 9820, cual ta e number (Whatsapp) di e fundacion. Of pose esaki via facebook, na Mi Voz ta Bo Voz”, Lisete a indica.
El a agrega cu e aña aki lo tin tres premio pa e potret mas creativo. E ta gradici e sponsornan cu lo coopera cu esaki. Riba facebook MVTBV por haya tur e informacion necesario y p’esey e kier encurasha henter e comunidad di Aruba, pa uni na e causa aki, ban pusha riba e aspecto preventivo, p’asina por evita mas tanto caso posible.
