ORANJESTAD (AAN): Dr. Yuri Casseres, representando Hospital, tabata presente diaranson durante e conferencia di prensa di Crisis Team hunto cu Gobierno pa asina trece dilanti e ultimo desaroyonan relaciona cu Covid-19 na Aruba.
Dr. Casseres a duna di conoce cu aworaki e situacion na Hospital ta bao control. No tin ningun caso riba ICU di Covid-19, pero tin otro pashentnan cu ta riba cuido intensivo.
E capacidad den cuido intensivo (ICU) na e momentonan aki ta suficiente. Toch un di e retonan cu Hospital tin ta cu e personal tambe ta duna positivo, no den hospital pero pafo di hospital, y no por asigna nan pa yuda den ICU, a splica.
Aunke omicron ta mustra cu no ta mesun fuerte cu Delta, pero ta spera cu e cantidadnan cu tin na Aruba cu ta bay tin algun pashent riba cuido intensivo. "Nos mester ta prepara pa esaki", Dr. Casseres a remarca.
CAPACIDAD DI CAMA
Banda di esaki Hospital tin otro reto, banda di e cantidad di personal cu ta positivo, door di e mudamento tin menos cama. Door di esey e tuma precaucion cu si hospital cuminsa yena por manda pashentnan den exterior.
Mayoria di e pashentnan lo wordo manda pa Colombia. A yega un areglo cu Colombia cu Aruba por manda pashentnan no solamente di ICU, pero otro tipo di pashentnan tambe cu yega cu Covid of sin Covid, a señala.
Ta informa tur pashent cu ta ingresa Hospital pa tur hende ta na altura cu nan lo por wordo manda Colombia den caso cu e capacidad ta haci'e necesario.
Dr. Yuri Casseres a laga sa cu na e momentonan aki no ta asina y no ta spera cu mester yega na esey, pero tin cu keda prepara pa si un situacion asina presenta.
