Apesar cu entrada a baha door di Covid-19 a logra sigui cu construccion, mantene y crea empleo

ORANJESTAD (AAN)—Director di SETAR NV, Ing. Roland Croes, a hiba palabra den conferencia di prensa relaciona cu e proyecto di renovacion y construccion di

teleshops, pero tambe a expone SETAR su pensamento y strategia durante e crisis di Covid-19, y con no obstante cu a bay atras den entrada, a yuda otro, pa supera e pandemia.

Ing. Roland Croes a cuminza na duna un splicacion strategico. El a splica cu SETAR su strategia ta basa riba cinco pilar, y e parti di teleshops y outlets (puntonan di benta), ta e pilar cu tin di haber cu producto y servicionan di e compania. Ora cu SETAR ta deal cu cliente, esaki ta un parti hopi importante. Tambe SETAR tin su tecniconan cu ta bishita e cliente, y e clientenan cu ta yama e central pa haya contacto cu e compania, y ademas, tin directamente, e lugarnan unda e cliente ta bay pa busca servicio di SETAR. Den e strategia aki e compania ta trahando riba tur e partinan y a yega e momento cu SETAR mester cambia tambe su outlets pa nan pas cu e temponan cu nos ta biba aden.

“ Den e vision aki e outlets ta masha importante mes, anto nos a cuminza cu un proceso di rediseña nan, for di dos pa tres aña pasa y awe nos ta bay na e di cinco cu ta e teleshop na Palm Beach”, Director di SETAR, Roland Croes a expresa.

Roland Croes a menciona cu aña pasa, ora cu e pandemia a dal Aruba, y logicamente SETAR cu, como tur compania, ta bay atras den entrada, mester a cambia e prioridad. “E construccion mester a cuminza aña pasa, pero a tarda un rato pasobra nos mester a wak con e desaroyonan ta bay y ora nos ta asina leu, finalmente nos a sinti cu nos por a haci e inversion aki”.

Como SETAR, Croes a agrega, aña pasa nan tabata tin diferente pensamento y un di nan tabata, banda di contribui, manera semper, cu su dividend y ganashi, sigui inverti y coopera, paga su parti na su shareholder cu ta gobierno y pueblo di Aruba, mester yuda tambe den e desaroyo economico.

“Y un di e maneranan ta mantene mas tanto empleado posible den e compania, direct y indirectamente. Laga nan keda cu trabao. Sin trabao no tin desaroyo na Aruba, anto nos a pone como meta tambe cu nos ta bay yuda den e aña dificil ey, henter Aruba, tur e contratistanan cu a traha cu nos, mantene cupo di trabao y crea empleo tambe, y nos a cumpli cune grandemente”, director di SETAR Roland Croes a señala.

El a expresa cu danki na e situacion nan por bisa hasta, cu SETAR a yuda crece otro companianan y nan empleadonan, y esaki ta parti di SETAR su strategia y pensamento cu e compania tin cu yuda otro, pasobra esey ta hopi importante. “E pueblo di Aruba, ora cu hendenan tin cupo di trabao, nan tur ta bay dilanti pa supera e pandemia. E ta mustra awo cu tur cos ta bayendo hopi bon, pasobra SETAR a cumpli cu esey tambe”, Ing. Roland Croes, director di SETAR, a conclui.