Na Museo Arqueologico Nacional
ORANJESTAD (AAN): Diahuebs venidero, esta 23 di april pa 7’or di anochi lo habri den Cas Rosenberg na Museo Arqueologico Nacional Aruba (MANA), e exposicion “Diario di Biahe, Diario di Soño”.
Artista Arturo Desimone hunto cu MANA, ta invita publico pa presencia e apertura di e exposicion durante un anochi ameno den nan hardin.
E expresionnan indigena na MANA, tabata e prome obranan di arte antiguo na cua e artista Arturo Desimone (Aruba, 1984) a ser exponi directamente. Desimone a pasa su prome 20 aña di bida na su isla natal y despues a hiba un bida nomadico na varios pais – di Hulanda pa Tunesia, Argentina y Colombia.
Sinembargo un eco di e misterionan di e arte indigena (precolonial), cu el a encontra na Aruba, a keda bin bek den su obranan. Nan ta interactua cu otro influencia- y realidad. Den su exposicion e ta presenta un diario ilustra di soño-, bestia- y biahenan.
Arturo Desimone ta expone su obranan di arte den Cas Rosenberg na MANA pa publico te fin di Juni 2026. Interesadonan por bishita e exposicion di dialuna pa diabierna entre 9’or di mainta te 5’or di atardi. Museo Arqueologico Nacional Aruba ta situa den e compleho di edificionan historico y moderno den Schelpstraat 42 na Oranjestad.
