Apertura di Solo-Expo fenomenal di dama hoben Pernile Tromp

ORANJESTAD (AAN): Diabierna anochi a tuma lugar den sala di exposicion di Cas di Cultura, e apertura di e solo-expo titula “Pernile Revival”. 

Un momento unico pa e talentoso dama hoben, Pernile Tromp presenta pa tur hende y na pueblo, djis un parti di su pinturanan y obranan di arte crea recien.

   E mayornan a splica, cu Pernile a cuminsa pinta como baby ora e tabatin 1 aña, y esaki a bira su gran pasion di e tempo ey.  Su hobby pues ta pintamento.  Como mucha enves di bay sinta hunga pafo, e ta pasa man pa su schrift y potlood pa asina pinta.  Riba su mes el a cuminsa domina su tecnicanan di pintura, y a pasa despues pa ademas di usa potlood, pa cuminsa pinta cu charcoal y tambe potlood di color.

   Un cantidad di famia, amigo, conocirnan y demas interesado tabata presente pa su apertura.  Y cada persona tabata admira e precision di cada linea di cabey, e forma fenomenal di crea shading pa tur sombra.  Tur su obranan a wordo poni na benta, y por a nota e anochi ey cu varios persona a cumpra tambe.

   Nan lo keda poni pa awor te cu Diabierna 30 di Augustus 2024 na Cas di Cultura.  Publico ta invita pa bay mira loke e artista hoben aki, cu no a ni haci 24 aña ainda, ta creando cu su habilidad preciso, y wowo skerpi pa tur detaye.  Por a mira cu Prome Ministro Evelyn Wever-Croes tambe a haci un bishita pa felicita e artista hoben aki.  DIARIO tambe ta desea Pernile Tromp tur clase di exito pa futuro.