Apertura di Festival di Buki pa Mucha di Biblioteca Nacional

ORANJESTAD (AAN): Astrid Britten, directora di Biblioteca Nacional a splica cu Dialuna nan a haci apertura di e di 30 edicion di Festival di Buki pa Mucha,

un evento cu ta tuma lugar tur aña, pero cu den ultimo dos aña mester a tuma lugar di manera virtual pa motibo di pandemia di Covid-19.

   E tema di e aña aki ta ‘Biba Natura-Lesa!’ y ta conta cu participacion di autornan di buki di Hulanda, Corsow, Boneiro, como tambe nos mesun autornan local. Por a mira muchanan entusiasma cu e cantidad di buki disponible.

   Segun Britten, manera semper lo tin hopi actividad na diferente scol cu autor, ilustrador, storia  y buki. Festival di Buki pa Mucha y otro actividadnan pa stimula lesamento ta keda relevante den tur tempo. Ta esencial pa mucha cuminsa lesa for di trempan y cu nan por desaroya esaki. Lesamento ta yuda rekeri conocimento cu por aplica den hopi area di bida y siña conoce nos mundo como tambe conoce loke ta biba den nos. Aunke cu informacion ta bira mas y mas visual, lesamento no ta perde su balor.

             E Festival di Buki pa Mucha ta e campaña anual mas grandi di Biblioteca Nacional Aruba pa stimula lesamento cerca mucha y ta tuma lugar den prome siman di november. E prome edicion di e Festival di Buki pa mucha tabata na 1993. Den ultimo 30 aña, hopi pero hopi autor di buki pa mucha, contador di storia y ilustrador a duna nan contribucion na e festival cu nan buki, storia, arte y presentacion. Ta tarea principal di BNA pa stimula lesamento pero mas importante ta pa laga cada mucha descubri e placer di lesamento.