Asja Dongen, Vocero di WEB Aruba NV:
*WEB ta reintroduci Gotito
ORANJESTAD (AAN): Asja Dongen, relacionista publico di WEB Aruba NV, ta splica di e compania su sosten pa e tema di cuido di bo oido. El a expresa palabranan di agradecimento na Quota Club of Aruba pa un biaha mas laga e compania ta parti di e campaña pa cuida oido.
Dongen a sigui bisa cu esaki ta e di 13 biaha cu WEB Aruba NV ta coopera. El a splica cu cuido di oido ta un asunto cu comunidad henter mester atende cu ne ya cu nan so no por combati e zonido, pero mester hacie hunto.
"Pesey nos ta pidi tur e diferente gruponan pa tene cuenta y yuda cuida oido", a expresa.
WEB Aruba NV a dicidi pa Carnaval 70 duna un 'push' extra principalmente na educador, mayor, hendenan grandi pa motiva e muchanan pa uza e' earplugs'. Pesey a saca Gotito atrobe for di cashi. A dun'e un 'facelift'. E generacionnan di añanan 80, awor nan ta e mayornan, e educadornan.
Pesey WEB Aruba NV ta apela cu Gotito y tur e pensamentonan cu esey ta trece pa medio di traha un 'jingle' y un video pa motiva hendenan grandi pa yuda cuida oido di e muchanan, a indica.
Algo cu tambe kier pone atencion na dje ta cu hopi biaha ta pensa cu door cu tin 'earplugs' bisti por bay hopi cerca di speaker. Pero esey no ta bon pasobra 'earplugs' ta proteha te na un cierto nivel di decibel. Si e musica tin decibelnan hopi mas halto, e ora ey niun 'earplug' no ta yuda mas.
Asja Donger a haci un apelacion na un y tur pa ban yuda cuida oido di e muchanan, pero di hende grandi tambe.
