Anochi di informacion encuanto cambernan na Hulanda tabata exitoso

Pa stimula e studiantenan pa aplica tempran pa vivienda

ORANJESTAD (AAN): Diaranson ultimo, den un sala “sold out” na The Movies na Gloria a tuma  luga un anochi informativo organiza pa Ministerio di Enseñansa y Deporte pa e studiantenan cu ta desea di continua cu nan estudio na Hulanda. Minister Endy Croes a habri e anochi informativo aki unda cu a presenta e proyecto y comparti informacion di vivienda na e ciudadnan mas popular pa e studiantenan na Hulanda.

   Durante e sesion informativo aki, tabatin diferente profesional cu a brinda informacion di, entre otro, alohamento (huisvesting) na Hulanda. Señora Lourdes Bramble-Tromp di Arubahuis a comparti e retonan pa haya un vivienda na Hulanda.

   E guera na Ukrania y Israel ta pone cu Hulanda ta hayando mas refugiado. Esaki ta trece cu ne cu cupo di camber ta bira menos. Aña pasa e lista di espera pa haya un camber tabata di 1 pa 2 aña, pero pa e aña aki esaki a bira di 2 pa 4 aña. Señora Sharina Dubero di e seccion Facilidad pa Estudio di Departamento di Enseñansa di Aruba a duna informacion di e fianza di Arubalening y con pa yega na un prestamo, alavez a contesta e preguntanan relaciona cu e topico aki. Adicionalmente, Señora Paloma Osorio di Fundacion Plan di Bida a duna informacion na e alumnonan tocante maneho di presupuesto.

   Den e simannan nos dilanti Señora Osorio lo bishita e scolnan secundario unda el lo duna un charla amplio tocante maneho di presupuesto.  Señora Liseanne Sambo – Gomez di Realign Caching, Consultancy & Services a trata e topiconan: escogencia di estudio y con pa yena e formularionan. Tambe, ta importante pa prepara tanto e mayor como e studiante pa e reto nobo aki. Por ultimo, Señora JoAnne Croes di High Edcuation North America Expo (HENA) cu a presenta e diferente posibilidadnan cu tin pa studia na Merca, alavez a invita e studiantenan pa HENA Expo cu ta tuma luga dia 1 di december proximo.

   Por ultimo, Minister Endy Croes ta gradici tur esnan cu a contribui den e proyecto aki. Tur aña den luna di october ta planifica pa organiza un anochi informativo pa asina cuminsa prepara e studiantenan cu ta continua cu nan estudio den exterior. Minister Endy Croes a indica cu e tabata un anochi fructifero, sumamento exitoso y ta contento cu e alumnonan a adkiri bastante informacion durante e evento.