ORANJESTAD (AAN) – Den cuadro di formacion di Gabinete Wever-Croes II, Formador Evelyn Wever-Croes a sigui reuni cu stakeholders externo y den e caso aki Animal Rights Aruba a haya oportunidad.
Pa duna informacion den conferencia di prensa di e resultado di e reunion aki, Nathalie Ventura a hiba palabra.
Nathalie Ventura a menciona cu ARA a trece varios punto dilanti Formador, cu ta hopi importante pa nan organizacion, y cu e ta spera cu pronto nan por mira un cambio riba nos dushi Isla, aunke nan sa cu tur cos ta bay paso pa paso.
Ventura a indica cu ARA a haya feedback cu pronto nan puntonan lo wordo trata, y cu lo tin mas reunion pa nan bay mas deep den cada punto. Un di e aspectonan cu el a menciona ta e problema di pushi cu cacho cu ta cana los den e comunidad, y cu ta trece disgusto den pueblo. Nathalie a bisa cu mester tene cuenta cu esaki ta un problema cu ta canando pa añanan y unda lo no mira un cambio di un dia pa otro. E ta tuma pueblo tambe pa participa den esaki, y mester tin un cambio tambe den e mentalidad pa mira un cambio entre pueblo, gobierno y e fundacionnan.
Pueblo pasobra na final di dia ta esun cu tin nan mascota. “E ta un problema den cual pueblo ta esun di mas importante, cu tin cu asumi su responsabilidad y acerca fundacionnan pa ayudo, of den e caso aki, cuminza na Veterinario, castra, opera nan mascota. Tur esaki ta hunga un rol hopi importante”, Nathalie a indica.
A bin dilanti, den reunion cu Formador, cu lo mester yega na un centro di control di cacho, pasobra si na final di dia no tin un caminda pa hiba e mascotanan y e fundacionnan no por tuma nan, na unda nan caba ta riba caya. “Nos ta di acuerdo cu un centro di control, ta necesario pa nos pais” Nathalie Ventura a reitera.
