Andres E. Davila ta e Chef Ehecutivo nobo di e Compleho di Aruba Marriott

ORANJESTAD (AAN): Aruba Marriott ta yama un caluroso bon bini na Chef Andres E. Davila,

kende a ser apunta como e Chef Ehecutivo pa e compleho di Aruba Marriott. Den su posicion nobo, Chef Davila ta encarga cu lidera e team culinario di e compleho di Aruba Marriott, cual ta inclui Aruba Marriot Resort & Stellaris Casino, Marriott’s Aruba Surf Club y Marriott’s Aruba Ocean Club.

            Davila ta trece cun’e 22 aña di experiencia den e mundo culinario den su posicion nobo, cual ta inclui 11 aña formando parti di e famia di Marriott. Prome cu a yama Aruba su hogar nobo, Davila a mantene e posicion di Chef Ehecutivo na Marriott Beach Resort na Grand Cayman, y tambe Chef Ehecutivo di JW Marriott Panama, caminda a maneha un ekipo di 70 persona cu supervision ariba e operacion di diferente restaurant nan cual pasa den e proceso di “rebranding” como tambe e proceso di apertura y e desaroyo di menunan nobo.

            Prome cu Davila a cuminsa su carera cu Marriott, el a cultiva su portfolio y experiencia cu boutique hotels di cinco strea y tambe cu compania nan di yate prestigioso abarca rond di mundo, for di Ecuador pa Panama y mas aleu.

            “Mi filosofia culinario ta cu platonan nutri a base di e experencianan cu un chef a biba” Davila ta bisa. “Mi ta hopi afortuna di por a biaha rond di mundo, desaroyando mi conocimento den diferente specerij, cultura y cuminda”. “Mi ta ansioso pa traha hunto cu e ekipo asombroso di e compleho di Aruba Marriott y comparti e conocimento di cual mi a acumula durante e añanan di experiencia y asina asisti nan den realisa nan propio estilo y pasion pa asina como ekipo nos por keda avansa den e mundo culinario.”.

            Davila a studia arte culinario, hospitalidad y turismo na ‘International Buenos Aires Hotel & Restaurant School’ na Argentina y a realisa su certificacion di ‘Sommelier’ for di ‘Universidad San Francisco de Quito’. Davila a competi y gana varios premio den competencianan y ferianan internacional, manera ‘2017 Truffle World Cup’ na Soria, Spaña, e ‘Sial Fair’ na Montreal, como tambe na ‘#Ecuadoreats Masterclasses’ na Toronto, entre otro durante su carera.

            Den su posicion nobo, Davila ta traha conhuntamente cu Aruba Marriott Resort su Sous Chef Ehecutivo, Ever de Peña y tambe cu e Sous Chef Ehecutivo di Marriott Vacations World Wide, Santiago Mancini. Hunto, nan ta supervisa e ekipo culinario di e compleho. Davila ta maneha tur aspecto operacional culinario cu ta inclui catering pa reunion y evento, como tambe e lo supervisa e operacion di e 14 restaurant nan ariba e compleho cu ta inclui Gelato & Co. te na nos restaurant exclusivo ariba beach, Atardi.