Aña 2024 tabata un aña di hopi reto pero a traha hopi duro y logra haci hopi mantencion

Director Anthony Irausquin:

*A logra cambia 750 palo di luz cu tabata deteriora 

ORANJESTAD (AAN) – Director di NV Elmar, señor Anthony Irausquin, den entrevista cu DIARIO a duna di conoce, cu aña 2024 tabata un aña di bastante reto, pero a logra cambionan relevante den mantencion.

El recorda cu na varios ocasion el a informa kico ta e motibonan, y hasta a duna un conferencia di prensa hunto cu un compania Mericano cu nan a acerca pa haya asistencia durante dos aña, pa yuda ELMAR reforma e parti do mantencion.

“Nos a bin ta traha hopi duro desde Juli cu su team tecnico y tambe cu e persona adicional cu a bin yuda nan. Y nos a bin sigui traha riba e plan, refina esaki y asina ehecut’e tambe, teniendo cuenta cu algun challenge cu ainda nan tabata tin di diferente material”, señor Irausquin a declara.

El a agrega cu gran parti di e material a wordo resolvi. Aña pasa nan a logra haci toch, basta mantencion, no tur loke nan tabata kier. Pero riba e parti di storing, por ehemplo, por a wak hopi cambio, mantencion, y a logra  preveni cierto storing.

“Nos tin datonan riba dje y nos ta sigui enfoca riba e areanan cu nos ta kere cu por tin storing nos dilanti. Nos a bisa bon cla tambe den e rueda di prensa e tempo ey, cu nos lo keda cu cierto storingnan pero actualmente, nos ta restaura coriente hopi lihe”, Irausquin a señala.

Pa locual ta aña 2025, e ta premira hopi mas mantencion. Tin cu ta cla, nan a cuminza caba eigenlijk, y a logra cambia 750 palo di luz, cu tabata deteriora, aña pasa.

Tambe a mantene un tiki mas cu 200 edificio cu ta transformer housenan. “Pues, si wak bon, e mantencion ta on going, y e frecuencia lo wordo hisa e aña aki; tur material tey, y e siman aki lo sigui pusha duro pa sigui cu e mantencionnan manera cu nan a planea, pasobra no a traha un plan pa cinco aña, y nos a acelera esaki”, señor Anthony Irausquin, director di NV Elmar a informa.