ORANJESTAD (AAN): “Nos como su amigo- y famia ta tristo cu loke delincuentenan a haci pa kita bida di nos ser stima,” ta loke a ser treci dilanti na DIARIO.
Riba Diahuebs, nan a hiba Francisco Angela mihor conoci como ‘Frans’ na su ultimo lugar di sosiego. Esey a socede 6 dia despues cu den oranan di mainta a hay’e benta cu hopi golpi na un forma raro otro banda dilanti Santana di Zeewijk.
“Nos y tambe famianan na comienzo a kere cu ta un Adicto Ambulante a comete e crimen aki, pero awor nos a bin haya sa cu ta un pareha.”
Pero loke nan como famia ta haya raro, ta cu mas di un siman a pasa caba, y di parti di Cuerpo Policial y tampoco Ministerio Publico, ainda nada concreto a ser treci dilanti riba loke exactamente a pasa riba e anochi di Diahuebs 17 di Maart pa Diabierna 18 di Maart. “Nan no a duna ni un conferencia di prensa, ni tampoco boletin di prensa.”
A ser treci dilanti, cu famianan ta disgusta cu e forma cu autoridadnan hudicial y Ministerio Publico ta mantene silencio, siendo cu tur hende cu a bay entiero por a mira claramente cu nan tan stima Frans Angela a wordo mata cruelmente. Famianan a compronde cu e dos personanan aki a secuestr’e cu su mesun auto, y na forma hopi brutal y agresivo, nan a tortur’e, a dune un mal bati, finalmente mate. Despues di esey ta parce cu e pareha a kita su pertenencianan di dje, ya djis bente sin ningun clase di respet banda di caminda na Zeewijk.
“Pueblo kier pa husticia prevalece y cu autoridadnan por actua.” Aki nan ta mustra cu si acaso autoridad no haci trabao meticulosamente, e ora “... pasobra kizas ta pueblo mes kizas tin di tuma ley den nos man?”
Nan ta recorda Frans como un ciudadano cu no ta bebe, ni huma, y aunke ta confronta tiki problema cu memoria, toch e ta sigui bishita su amistadnan so. Kizas e pareha aki a mire cu cartera yen placa, y di hopi tempo a cuminza planea pa comete e acto aki. Famia no ta kere cu ta di un dia pa otro e delincuentenan a formula e plan. Pero kizas pa awor famia lo no haya contesta, pues lo tin di warda te dia cu e caso aki presenta den Corte dilanti Huez.
Loke amigo y bisiñanan a bin topa cune na e entiero, ta un cara di Frans yena di golpi, cuero rond di wowo ta hopi hincha cu mancha blauw, mescos cu su mannan, y casi no por a reconoce. Tambe tin marca di basta tortura y posible strangulamento na su garganta tambe.
Nan a finaliza bisando: “Autoridadnan tin di corda cu famianan merece di haya informacion di loke a pasa cu nan ser keri. At least esey nan merece di haya sa, pa asina kita tur incertidumbre.”
