AMI- Aruba Mindfulness Institute a keda lansa cu e vision di Aruba Wellness 5.0

ORANJESTAD (AAN):  Aruba Mindfulness Institute a lansa oficialmente Diamars 30 di September, den Lieverd Lees Café na Biblioteca Nacional.

Luna di October ta luna di Salud Mental Mundial, un momento ideal pa presenta e proyectonan nobo di bienestar pa e comunidad.

            Presidente, Shanti Augusta Arends y secretaria, Leontine Merkies, a duna un presentacion na famianan, amistad, clientenan y directornan di organisacionan presente. E objetiva di e fundacion ta pa haci educacion y eksperiensia di bienestar accesibel pa tur hende. Shanti ta splica cu “Bienestar no ta un luho of hobby, pero un necesidad pa un isla prospero.  Den e era di avanse rapido di tecnologia, tambe yama Industry 4.0, ta wak cu e salud mental mundialmente ta cai atras y mester bin cu initiativanan duradero pa crea un pilar paralelo oposito, cu ta e Wellness 5.0.”

Leontine a ilustra algun puntonan clave di e statuten y a presenta proyectonan actual, cu ta e programa inspirativo y educativo, Gota di Paz, tur Dialuna y Diasabra na Canal 90FM, Mindful Monday Moment na Universidad di Aruba y e Wellness Café cu ta bai cuminsa tur prome Diaranson di cada luna den Lieverd Leescafe na BNA.

E anochi tambe a celebra e prome colaboracion oficial cu Shoco Wellness di Universidad di Aruba cu e proyecto conhunto, Mindful Monday Moment. Juliet Chieuw, cordinador di Shoco Wellness tambe a hiba palabra y a firma y entrega un cheque simbolico na AMI pa marca e comienso di un colaboracion fructifero cu mas planes di bienestar pa comunidad den futuro.

Despues di un break cu snacks bon surti di Lieverd Lees Café a sigui e anochi cu e Wellness Café, unda Shanti a elabora riba e topico di ‘Kiko ta Bienestar’, hunto a hasi practica di mindfulness, reflexion y despues tur hende tawatin e oportunidad di intercambia cu otro.

A completa e anochi cu canto live di Natie V acompaña pa cu guitara acustico. Natie a canta un version inspirante di ‘Imagine’ na Papiamento y asina marca e prome anochi exitoso di Wellness Café. E siguiente lo ta riba Diaranson 5 di November.

E Monday Mindful Moment ta habri pa publico riba tur e Dialunanan 12.30-1pm, cuminsando 6 di October te cu 10 di December den e kapel Maria Convent na Universidad di Aruba.
Directiva di AMI ta sumamente agradecido na e reaccion positivo y entusiasmo di tur presente y esaki a duna hopi speransa pa realisa e metanan hunto.

Manera Tesorero Marla Ponson a bisa “ Small seeds today, a forest of impact tomorrow.
 Let's grow together “