Ambiente musical durante weekend na San Nicolas

ORANJESTAD (AAN): E siman unda e enfoke lo ta dirigi completamente riba San Nicolas a yega! 

Pasobra Artweek Aruba 2022 lo cuminza awe Dialuna 31 di October 2022, y lo finaliza te Diadomingo 6 di November 2022.  Ya caba e dianan aki por mira varios artista ta pintando muralnan nobo na San Nicolas.  Y den henter e siman aki lo tin actividad special cu tin di haber cu e promocion di arte y su beyeza.

   DIARIO a tuma nota cu den fin di siman cu a pasa, ya caba San Nicolas tabatin su ambiente.  Por a nota cu hopi auto ta pasa caba rond ta check esnan cu ta yuda verf e murayanan.

   A nota cu no solamente turistanan a bay disfruta di e ambiente nan aki, pero tambe nos hendenan local.  Tabatin algun caminda cu hasta animacion musical en vivo.

   Den combersacion cu algun persona, nan ta contento cu Artweek Aruba ta cuminza, y cu fin di siman venidero lo tin Aruba Art Fair den henter Promenade.  Pero nan ta spera cu mas atencion por wordo duna pa San Nicolas y crea mas ambiente eyriba, pa asina yuda e ciudad sali for di loke ta den boca di pueblo ainda tin algun cu ta yam’e, “the forgotten city”.